بھارت کی دفاعی کوتاہیاں اور اندرونی بدعنوانیاں ایک بار پھر عالمی سطح پر بے نقاب ہو گئیں، بھارتی فضائیہ کے سربراہ ایئر مارشل اے پی سنگھ نے بھارت کے دفاعی خریداری کے عمل میں شدید خامیوں کا سرعام اعتراف کرلیا۔
یہ بھی پڑھیں:معرکہ بنیان مرصوص: کانگریسی رہنما نے بھارت کی عبرتناک شکست تسلیم کر لی
میڈیا رپورٹس کے مطابق بھارتی ایئر چیف اے پی سنگھ نے کہا کہ ٹائم لائنز کا تصور ختم ہو چکا، بھارت میں کوئی بھی بڑا دفاعی منصوبہ مقررہ وقت پر مکمل نہیں ہوتا۔
انہوں نے مزید انکشاف کیا کہ معاہدے کے تحت بہت سے سسٹم کبھی بھی ڈیلیور نہیں کیے جاسکتے، پھر بھی معاہدے پر دستخط ہوتے ہیں۔
انہوں نے شکوہ کیا کہ معاہدے ہو جاتے ہیں، لیکن ہتھیار نہیں پہنچتے۔
انہوں نے آپریشن سندور کا حوالہ دیتے ہوئے کہا کہ بھارت کی فوجی قیادت کے لیے اٹھ کھڑے ہونے کا وقت ہے۔ ایئر چیف نے تسلیم کیا کہ جدید جنگ کی نوعیت تیزی سے بدل رہی ہے اور اس میں اسٹریٹجک تبدیلی کی ضرورت ہے۔
بھارتی فضائیہ کے سربراہ کی غیر معمولی عوامی تنقید نے بھارت کے دفاعی شعبے کی شفافیت، کارکردگی اور تیاری پر سنگین سوالات اٹھائے ہیں۔
یاد رہے کہ بھارت کی جانب سے پاکستان پر بے بنیاد الزامات کے بعد آپریشن سندور شروع کیا گیا تھا۔ اس کے جواب میں، پاکستان ایئر فورس (پی اے ایف) نے جوابی کارروائی کی اور مبینہ طور پر 6 بھارتی طیاروں کو مار گرایا، جس میں رافیل جیٹ طیارے بھی شامل تھے۔ اس فضائی لڑائی نے بھارت کی کمزوریوں کو بے نقاب کیا۔
