مردان کے علاقے آرام کالونی میں ہفتہ کے روز ایک گیس سلنڈر کے دھماکے سے 2 منزلہ مکان کی چھت گر گئی، جس کے نتیجے میں 6 افراد جاں بحق اور 2 لڑکیاں شدید زخمی ہو گئیں۔
یہ بھی پڑھیں:گیس سلنڈر کے حادثات سے بچنا کیسے ممکن ہے؟
ریسکیو 1122 کے ترجمان بلال احمد فیضی کے مطابق، امدادی ٹیموں نے فوری طور پر جائے وقوعہ پر پہنچ کر ملبے تلے دبے 8 افراد کو نکالا، جن میں خواتین اور بچے بھی شامل تھے۔
ریسکیو آپریشن میں 100 سے زائد اہلکاروں نے حصہ لیا اور 7 گھنٹوں میں مکمل کیا گیا۔ تمام زخمیوں اور جاں بحق افراد کو مردان میڈیکل کمپلیکس منتقل کر دیا گیا۔
میڈیا رپورٹ کے مطابق مردان کے ڈپٹی کمشنر عظمت اللہ وزیر، ڈسٹرکٹ ایمرجنسی آفیسر سید شعیب منصور اور اسسٹنٹ کمشنر جنید خالد نے موقع پر موجود رہ کر امدادی کارروائیوں کی نگرانی کی۔
پولیس اور ریسکیو حکام کے مطابق، دھماکا گیس سلنڈر کے پھٹنے سے ہوا۔
یہ بھی پڑھیں:پشین کے نجی اسپتال میں گیس لیکج کے باعث دھماکا، 7 افراد زخمی
پاکستان میں ایل پی جی سلنڈرز کے لیک ہونے یا پھٹنے کے واقعات معمول بن چکے ہیں۔ رواں سال کے آغاز میں ملتان میں ایک ایل پی جی ٹینکر کے دھماکے سے کم از کم 19 افراد جاں بحق اور درجنوں زخمی ہوئے تھے، جس کے بعد سینیٹ کی قائمہ کمیٹی نے ملاوٹ شدہ ایل پی جی کی فروخت کی تحقیقات کا حکم دیا تھا۔
