اسلام آباد میں پاکستان اور یورپی یونین کے درمیان جوہری عدم افزودگی اور تخفیفِ اسلحہ سے متعلق مذاکرات کا پانچواں دور مکمل کرلیا گیا ہے، مذاکرات کا اگلا دور آئندہ برس برسلز میں ہوگا۔
ترجمان دفتر خارجہ کے مطابق پاکستان اور یورپی یونین کے درمیان جوہری عدم افزودگی اور تخفیفِ اسلحہ سے متعلق مذاکرات کا پانچواں دور رواں ماہ کی 12 تاریخ کو منعقد ہوا، جس میں عالمی و علاقائی امن، تزویراتی استحکام، اور سکیورٹی سے متعلق اہم معاملات پر تفصیلی تبادلہ خیال کیا گیا۔
🔊PR NO: 1️⃣7️⃣8️⃣/2️⃣0️⃣2️⃣5️⃣
Joint Pakistan-European Union Press Release on the Fifth Round of Dialogue on Non-Proliferation and Disarmament.
🔗⬇️https://t.co/M8M2huj7CN pic.twitter.com/KYJCl7dNda
— Ministry of Foreign Affairs – Pakistan (@ForeignOfficePk) June 20, 2025
پاکستان اور یورپی یونین کی جانب سے جاری کردہ مشترکہ اعلامیے کے مطابق مذاکرات کے دوران فریقین نے اقوامِ متحدہ کی جنرل اسمبلی کی فرسٹ کمیٹی، کانفرنس برائے تخفیفِ اسلحہ، معاہدہ برائے حیاتیاتی ہتھیار اور معاہدہ برائے کیمیائی ہتھیار کے تناظر میں بھی متعدد پہلوؤں پر گفتگو کی۔
بات چیت میں جدید ٹیکنالوجیز، ایکسپورٹ کنٹرول سے متعلق حالیہ رجحانات، اور ان کے عالمی امن و استحکام پر اثرات پر بھی غور کیا گیا۔ دونوں فریقین نے اعتراف کیا کہ جوہری عدم افزودگی اور تخفیفِ اسلحہ کا موضوع پاکستان اور یورپی یونین کے وسیع تر تزویراتی تعلقات کا ایک اہم ستون ہے۔
مزید پڑھیں: دہشتگردی کے خلاف جنگ سے ہماری توجہ ہٹانا عالمی استحکام کے لیے خطرہ ثابت ہوگا، پاکستان
ترجمان دفتر خارجہ کے مطابق فریقین نے اس پلیٹ فارم کو مستقبل کے لیے ایک نتیجہ خیز مکالمے کا ذریعہ قرار دیتے ہوئے اتفاق کیا کہ مذاکرات کا اگلا دور 2026 میں برسلز میں منعقد ہوگا۔
پاکستانی وفد کی قیادت ایڈیشنل سیکریٹری خارجہ برائے تخفیفِ اسلحہ و بین الاقوامی سیکیورٹی، طاہر اندرابی نے کی، جبکہ خصوصی نمائندہ برائے جوہری عدم افزودگی، تخفیفِ اسلحہ و سیکیورٹی اسٹیفن کلیمنٹ نے یورپی یونین وفد کی قیادت کی۔
