پاکستان نے کوریا میں ہونے والی ایشیئن جونیئر اسکواش چیمپیئن شپ میں شاندار کارکردگی دکھاتے ہوئے 2 طلائی، 2 چاندی اور ایک کانسی سمیت مجموعی طور پر 7 میڈلز اپنے نام کر لیے، جبکہ پلیٹ ڈویژن میں بھی 2 ٹائٹل حاصل کیے۔
بوائز انڈر-13 فائنل میں سہیل عدنان نے بھارت کے ایان دھنکا کو 11-5، 11-2، 11-13، 11-6 سے شکست دے کر سونے کا تمغہ جیتا، جبکہ انڈر-15 فائنل میں نعمان خان نے احمد ریان خلیل کو 12-10، 11-6، 11-2 سے شکست دے کر طلائی تمغہ حاصل کیا۔ اسی کیٹیگری میں احمد ریان کو سلور میڈل ملا۔
گرلز انڈر-13 فائنل میں ماہ نور علی نے سخت مقابلے کے بعد چین کی یان شیوان سے شکست کھائی اور چاندی کا تمغہ حاصل کیا۔ میچ کا اسکور تھا: 9-11، 11-6، 11-9، 9-11، 12-10۔
مزید پڑھیں: اسکواش میں پاکستان کی بتدریج واپسی، حمزہ خان گولڈن اوپن چیمپیئن شپ جیت گئے
اس شاندار قومی کارکردگی پر وزیراعظم محمد شہباز شریف نے اسکواش چیمپئن شپ کے فاتح کھلاڑیوں کو دل کی گہرائی سے خراجِ تحسین پیش کیا۔
وزیراعظم نے انڈر 15 مقابلوں میں نعمان خان اور انڈر 13 میں سہیل عدنان کی طلائی کامیابیوں، انڈر 15 میں احمد ریان خلیل اور گرلز انڈر 13 میں ماہ نور علی کی چاندی کے تمغے پر کھلاڑیوں، ان کے اہلِ خانہ اور پوری قوم کو مبارکباد دی۔
وزیراعظم نے کہا کہ ایشیئن جونیئر اسکواش چیمپئن شپ کے فائنل مقابلوں میں پاکستانی کھلاڑیوں کی جیت اور پورے ٹورنامنٹ میں 7 میڈل جیت کر آپ نے پوری قوم کے دل جیت لیے ہیں۔ پوری قوم کو آپ پر فخر ہے۔ میری دعا ہے کہ آپ کی کامیابیوں کا یہ سلسلہ مستقبل میں بھی جاری رہے۔
یہ کامیابیاں نہ صرف پاکستان کے روشن مستقبل کی علامت ہیں بلکہ ملک میں اسکواش کے احیا کا نیا آغاز بھی ثابت ہوسکتی ہیں۔
