حکومت بلوچستان نے دہشتگردوں کی تصاویر یا ویڈیوز بنانا جرم قرار دے دیا ہے۔
محکمہ اطلاعات بلوچستان کی جانب سے جاری اشتہار میں عوام کو خبردار کیا گیا ہے کہ دہشتگردوں کے ساتھ کسی بھی قسم کی تصاویر، ویڈیوز یا معاونت میں شامل ہونا سنگین جرم ہے اور اس سے شہریوں کی جان و مال کو بھی خطرہ لاحق ہو سکتا ہے۔
یہ بھی پڑھیں: بلوچستان میں دہشتگردی کے واقعات میں اضافہ، محکمہ داخلہ نے رپورٹ جاری کردی
اشتہار میں کہا گیا ہے کہ حالیہ دہشتگردی کی کارروائیوں کے دوران بعض افراد کو دہشتگردوں کے ہمراہ تصاویر یا ویڈیوز بناتے ہوئے دیکھا گیا ہے جو ریاست مخالف سرگرمی میں معاونت کے مترادف ہے، اس طرح کی سرگرمیاں قانونی طور پر جرم ہیں اور اس پر کارروائی کی جاسکتی ہے۔
محکمہ اطلاعات کے بیان کے مطابق دہشتگردی کے کسی واقعے کے بعد جائے وقوعہ پر ہجوم جمع کرنا یا ویڈیوز بنانا نہایت خطرناک ثابت ہوسکتا ہے۔ اس دوران اگر سیکیورٹی فورسز کے رسپانس آپریشن میں کسی فرد کو جانی یا مالی نقصان پہنچتا ہے تو اس کی ذمہ داری خود اسی فرد پر عائد ہوگی۔
یہ بھی پڑھیں: بلوچستان میں دہشتگردی کی صورتحال سنگین، رواں سال کے پہلے 6 ماہ میں 45 فیصد اضافہ
حکومت بلوچستان نے عوام سے اپیل کی ہے کہ وہ ریاست مخالف عناصر اور دہشتگردی سے مکمل طور پر دور رہیں، کسی بھی مشتبہ یا غیر ضروری سرگرمی میں ملوث نہ ہوں اور امن و امان کے قیام کے لیے سکیورٹی فورسز اور انتظامیہ کے ساتھ بھرپور تعاون کریں۔
محکمہ اطلاعات نے کہا ہے کہ شہریوں کا فرض ہے کہ وہ کسی بھی مشتبہ سرگرمی کی اطلاع فورسز کو دیں تاکہ دہشتگردوں کے عزائم کو ناکام بنایا جا سکے اور بلوچستان میں امن و استحکام برقرار رکھا جا سکے۔
