ڈیگاری میں غیرت کے نام پر مرد اور خاتون قتل کیس میں پولیس نے واقعے میں نامزد گرفتار ملزم بشیراحمد کا 2 روزہ جسمانی ریمانڈ حاصل کرلیا۔ جوڈیشل مجسٹریٹ 12 سیف اللہ ترین نے پولیس کی استدعا پر ریمانڈ دیا۔ نامزد ملزم بشیراحمد کو فائرنگ کے دوران ویڈیو میں دیکھا جاسکتا ہے۔ بشیراحمد کو دوروزہ ریمانڈ پر سیریس کرائم انویسٹیگیشن ونگ کے حوالے کردیا گیا۔
یہ بھی پڑھیں بلوچستان میں مرد اور خاتون کے قتل کا فیصلہ سنانے والے بلوچ سردار شیزباز خان ساتکزئی کون ہیں؟
قبل ازیں کوئٹہ کے علاقے سنجیدی ڈگاری میں غیرت کے نام پر قتل کیے گئے مرد و عورت کے لرزہ خیز واقعے کا پوسٹ مارٹم مکمل کر لیا گیا۔ پولیس سرجن ڈاکٹر عائشہ فیض کے مطابق 38 سالہ مرد کو 9 اور 35 سالہ خاتون کو 7 گولیاں ماری گئیں۔ واقعہ 4 جون 2025 کو پیش آیا۔ خاتون حاملہ نہیں تھی اور لاش خراب حالت میں ملی۔
یاد رہے کہ مقامی جرگے کے فیصلے کے مطابق بانو نامی خاتون اور احسان اللہ کو قتل کیا گیا۔ پولیس کے مطابق یہ فیصلہ ساتکزئی قبیلے کے سردار نے دیا جبکہ واردات میں 3 گاڑیوں پر مشتمل گروہ ملوث تھا۔ قتل کی ویڈیو منظرعام پر آنے کے بعد سوشل میڈیا پر شدید ردعمل دیکھنے میں آیا۔
یہ بھی پڑھیے بلوچستان: پسند کی شادی کرنے والے جوڑے کا قتل، ایف آئی آر میں کیا لکھا گیا؟
واضح رہے کہ صوبہ بلوچستان کے علاقے سنجیدی ڈیگاری میں غیرت کے نام پر ایک خاتون اور ایک مرد کے قتل کی واردات سے متعلق ایف آئی آر تھانہ ہنہ اورڑک، کوئٹہ میں ایس ایچ او نوید اختر کی مدعت میں درج کی گئی۔
ایف آئی آر کے مطابق چند روز قبل سوشل میڈیا پر ایک ویڈیو وائرل ہوئی تھی جس میں ایک ہجوم اکٹھے ہوکر ایک عورت اور ایک مرد کو فائرنگ کرکے قتل کر رہا تھا۔ یہ وقوعہ عیدالاضحیٰ سے 3 روز قبل سنجیدی ڈیگاری کے ایریا میں رونما ہوا تھا۔ جس میں بانو بی بی زوجہ نور محمد قوم ساتکزئی اور احسان اللہ کو شاہ وزیر، جلال،فکری منیر، بختیار، ملک امیر جان، عجب خان، جان محمد، بشیر احمد اور دیگر بانو بی بی اور احسان اللہ کو گاڑیوں میں ڈال کر سردار شیر باز خان کے پاس فیصلے کے لیے لے گئے۔
یہ بھی پڑھیں: غیرت کے نام پر دہرے قتل کا مقدمہ: ہلاک شدگان کے درمیان کوئی ازدواجی رشتہ نہیں تھا، وزیراعلیٰ بلوچستان کا انکشاف
سردار شیر باز خان نے فیصلے میں کہا کہ بانو بی بی اور احسان اللہ کاروکاری کے مرتکب ہوئے ہیں، لہذا ان کو قتل کیا جائے۔ اسی فیصلے کی بنا پر، ملزمان نے بانو بی بی اور احسان اللہ کو سنجیدی میدان میں آتشیں اسلحے سے فائرنگ کرکے قتل کیا اور وقوعہ کی ویڈیو بناتے رہے۔
ایف آئی آر کے مطابق واقعہ کے دوران ویڈیو بنائی گئی اور سوشل میڈیو کے ذریعے اپ لوڈ کرکے عوام میں خوف و ہراس پھیلا گیا۔ پولیس نے ملزمان کے خلاف انسداد دہشتگردی ایکٹ زیر دفعہ 302ت پ اور دیگر دفعات کے تحت مقدمہ درج کرلیا۔
