مسقط سے ممبئی آنے والی ایئر انڈیا ایکسپریس کی ایک پرواز اُس وقت حیرت انگیز منظر کی گواہ بنی جب ہزاروں فٹ بلندی پر ایک تھائی خاتون نے بچے کو جنم دیا۔
ائیر لائن کی جانب سے جاری بیان کے مطابق خاتون کو دورانِ پرواز دردِ زہ شروع ہوا تو طیارے میں موجود ایک نرس اور کیبن کریو نے فوری طور پر مدد فراہم کی اور بچے کی بحفاظت ولادت کروائی۔
یہ بھی پڑھیں:بس میں بچے کی پیدائش کے بعد والدین نے کیا مجرمانہ حرکت کی؟
ترجمان کے مطابق جیسے ہی تھائی شہری خاتون کو لیبر پین شروع ہوا، عملے نے اپنی تربیت کا بہترین مظاہرہ کرتے ہوئے ایک محفوظ اور ہمدردانہ ماحول فراہم کیا۔
پائلٹس نے صورتحال سے کنٹرول ٹاور کو مطلع کرتے ہوئے ممبئی ایئرپورٹ پر ترجیحی لینڈنگ کی درخواست کی۔
طیارہ جیسے ہی ممبئی پہنچا، طبی ٹیم اور ایمبولینس پہلے سے موجود تھی، جو ماں اور نومولود کو قریبی اسپتال لے گئی۔
ائیر لائن کا کہنا ہے کہ ایک خاتون اسٹاف ممبر بھی ان کے ساتھ روانہ ہوئی تاکہ تعاون فراہم کیا جا سکے۔
یہ بھی پڑھیں:دورانِ پرواز بچے کی پیدائش، پائلٹ دائی بن گیا
ایئرانڈیا ایکسپریس نے مزید بتایا کہ وہ ممبئی میں تھائی قونصل خانے کے ساتھ رابطے میں ہے تاکہ ماں اور بچے کی واپسی میں ہر ممکن مدد فراہم کی جا سکے۔
