ورلڈ چیمپیئن شپ آف لیجنڈز میں پاکستان چیمپیئنز کے مالک کامل خان نے کہا ہے کہ بدقسمتی سے ہم دوبار فائنل میں پہنچے مگر فائنل نہیں جیت سکے۔ لاکھوں پاکستانیوں سمیت ہم سب کی خواہش تھی کہ ٹائٹل جیتیں مگر ایک دن کی بری کارکردگی کا مطلب یہ نہیں کہ ٹیم میں کوئی کمی تھی۔
ان کا کہنا تھا کہ ہم اگلے سال دوبارہ آئیں گے اور ان شااللہ ٹرافی جیتیں گے۔ ہم جب تک کھلیں گے جب تک چیمپیئنز شپ جیت نہیں جاتے، بلکہ جیت کے بعد بھی فتوحات کا سلسلہ جاری رکھیں گے۔ ورلڈ لیجنڈز لیگ ایک نجی کرکٹ لیگ ہے، اسے پی سی بی تو اون نہیں کرتا اسے میں اون کرتا ہوں۔
مزید پڑھیں: ورلڈ چیمپیئن شپ آف لیجنڈز فائنل: جنوبی افریقہ نے پاکستان کو ہرا کر ٹائٹل اپنے نام کرلیا
کامل خان نے کہا کہ پاکستان ایک یونیورسل نام ہے، اسے استعمال کرنے سے ہمیں کوئی نہیں روک سکتا، ہم پاکستانی ہیں اور یہ نام ہمارا فخر ہے۔ ہم نے چیئرمین پی سی بی محسن نقوی سے باقاعدہ این او سی لیا تھا، جس پر میں ان کا بے حد مشکور ہوں۔
اگلے برس پی سی بی کی جانب سے این او سی نہ ملنے کے سوال پر ان کا کہنا تھا کہ یہ تو قبل از وقت کا سوال ہے، انہیں ایسی کوئی اطلاع نہیں ہے کہ ایسی کوئی صورتحال ہے۔ اور نہ ہی اس بارے میں مجھے کچھ بتایا گیا ہے، ہم دوبارہ آئیں گے اور جیتیں گے۔
