معروف فلمساز سنیل درشن نے ایک بار پھر اکشے کمار اور پریانکا چوپڑا کے درمیان مبینہ تعلقات پر بات کرتے ہوئے کہا ہے کہ شادی شدہ مردوں کو زیادہ ذمہ داری کا مظاہرہ کرنا چاہیے، اس واقعے کے لیے پرینکا کو قصوروار نہیں ٹھہرایا جا سکتا۔
سنیل درشن، جنہوں نے اکشے کمار کے ساتھ لگاتار 7 فلموں میں کام کیا تھا، نے انکشاف کیا کہ دونوں کے درمیان تعلقات میں دراڑ اسی وقت آئی جب اکشے کی پریانکا کے ساتھ مبینہ قربت کی خبریں گردش کرنے لگیں۔
سنیل درشن کا انکشاف
بولی ووڈ ببل کو دیے گئے حالیہ انٹرویو میں ان سے پوچھا گیا کہ آخر ایسا کیا ہوا تھا کہ اکشے کمار نے فلم ’برسات‘ کی شوٹنگ کے دوران ہی کام چھوڑ دیا تھا؟ سنیل درشن نے بتایا کہ وہ فلم ’برسات‘کی شوٹنگ شروع کر چکے تھے اور اکشے و پریانکا کے ساتھ ایک گانا بھی فلمبند کر لیا گیا تھا۔ مگر اس کے بعد اکشے کمار نے انہیں بتایا کہ اُن کی ذاتی زندگی میں مسائل چل رہے ہیں اور فلم کو صرف ایک اداکار کے ساتھ مکمل کرنے کی درخواست کی۔
یہ بھی پڑھیے اداکارہ پریانکا چوپڑا نے بالی ووڈ کیوں چھوڑا اور ہالی ووڈ کا تجربہ کیسا رہا؟
سنیل درشن نے کہا
’میرا ماننا ہے کہ تمام اداکاروں کو ذمہ دار ہونا چاہیے، لیکن شادی شدہ مردوں کو اور بھی زیادہ محتاط رہنا چاہیے۔ غلطی کرنا انسان کی فطرت ہے، مگر اکثر ان کی ان غلطیوں کا خمیازہ پروڈیوسرز کو بھگتنا پڑتا ہے۔ میں اس ‘حادثے’ کا ذمہ دار پرینکا کو نہیں ٹھہراتا۔‘
یہ پہلا موقع نہیں کہ سنیل درشن نے اس معاملے پر بات کی ہو۔ اس سے قبل بھی وہ اشارہ دے چکے ہیں کہ اکشے کی اہلیہ ٹوئنکل کھنہنے شوہر کو پریانکا چوپڑا کے ساتھ مزید کام کرنے سے روک دیا تھا۔
یہ بھی پڑھیے ’پریانکا کے سیٹ پر ڈائن کی طرح بیٹھی رہتی تھی‘، مدھو چوپڑا کا انکشاف
سنیل درشن نے مزید کہا کہ اکشے کمار کے ساتھ ان کے تعلقات ختم ہوئے تقریباً 20 سال ہو چکے ہیں۔ اور اس کے بعد دونوں کے درمیان کوئی بات چیت نہیں ہوئی۔
اکشے کمار اور پریانکا چوپڑا نے ایک وقت میں کئی ہٹ فلموں میں ایک ساتھ کام کیا، جن میں ‘مجھ سے شادی کروگی‘، ’انداز‘، اور ’اعتراض’ شامل ہیں۔ تاہم، دونوں نے بعد میں ایک ساتھ کام کرنا بند کر دیا، جس پر میڈیا میں مختلف قیاس آرائیاں کی جاتی رہیں۔
