گورنرخیبرپختونخوا فیصل کریم کنڈی نے کہا ہے کہ وہ کسی بھی حکومت کو گرانے کے حق میں نہیں ہیں۔ اگر ایوان میں ہمارا ایک بھی رکن زیادہ ہو گیا تو ہم تحریک عدم اعتماد لائیں گے، اور خدشہ ہے کہ پی ٹی آئی خود وزیراعلیٰ خیبرپختونخوا کے خلاف عدم اعتماد کا فیصلہ کر سکتی ہے۔
بھٹ شاہ میں میڈیا سے بات کرتے ہوئے انہوں نے کہا کہ خیبرپختونخوا میں امن قائم رکھنے والے ہر کردار کے ساتھ کھڑے رہیں گے، جبکہ پی ٹی آئی والوں کو عدالتوں سے ریلیف لینا چاہیے کیونکہ انہیں کوئی این آر او نہیں دیا جائے گا۔
مزید پڑھیں: وزیراعلیٰ کے پی سے دوستی نہیں، فیصل کریم کنڈی نے علی امین گنڈاپور کو ’کل کا بچہ‘ قرار دیدیا
گورنر کا مزید کہنا تھا کہ جو لوگ ماضی میں این آر او دینے سے انکار کرتے تھے، آج خود این آر او کی درخواست کر رہے ہیں۔ انہوں نے 9 مئی کے واقعات کے ذمہ داروں کو سزا دینے پر زور دیا اور کہا کہ جزا و سزا کا نظام ٹھیک کیے بغیر ملک کا نظام درست نہیں ہو سکتا۔
انہوں نے علی امین گنڈا پور کو قابل اور اچھا بچہ قرار دیا اور کہا کہ وہ وکٹ کے دونوں اطراف کھیلتے ہیں۔ گورنر نے یہ بھی کہا کہ خود کو بہت سمجھدار سمجھنے والے سینیٹ میں حلف لینے کے لیے بھی حاضر نہیں ہوئے۔
