چیف آف آرمی اسٹاف فیلڈ مارشل سید عاصم منیر نے خیبر پختونخوا کے سیلاب سے متاثرہ عوام کی فوری بحالی اور امداد کے لیے فوج کو خصوصی ہدایات جاری کر دی ہیں۔
یہ بھی پڑھیں: خیبر پختونخوا، آزاد کشمیر اور گلگت میں طوفانی بارشوں سے تباہی، 200 سے زیادہ اموات، پاک فوج کا ریلیف آپریشن جاری
سیکیورٹی ذرائع کے مطابق آرمی چیف نے ہدایت دی ہے کہ خیبر پختونخوا میں تعینات فوج متاثرین کی بحالی میں بھرپور معاونت فراہم کرے گی اور اس سلسلے میں اضافی فوجی دستے بھی روانہ کیے جا رہے ہیں۔
ذرائع کا کہنا ہے کہ پاک فوج نے اپنی ایک دن کی تنخواہ خیبر پختونخوا کے سیلاب متاثرین کے لیے وقف کر دی ہے۔ اس کے ساتھ ساتھ فوج نے اپنا ایک دن کا راشن، جو کہ 600 ٹن سے زائد بنتا ہے، متاثرہ علاقوں میں براہِ راست امداد کے لیے مختص کر دیا ہے۔
ذرائع کے مطابق آرمی چیف نے کور آف انجینئرز کو بھی ہدایت جاری کی ہے کہ متاثرہ علاقوں میں پلوں کی مرمت کا کام فوری بنیادوں پر مکمل کیا جائے اور جہاں ضرورت ہو وہاں عارضی پل تعمیر کیے جائیں تاکہ آمد و رفت بحال کی جا سکے۔
مزید پڑھیے: خیبرپختونخوا: سیلاب متاثرین کی مدد کے لیے جانے والا سرکاری ہیلی کاپٹر تباہ، 5 افراد شہید
علاوہ ازیں آرمی کے نائن یونٹ کے ریسکیو سنیفنگ ڈاگ یونٹ کو بھی متاثرہ علاقوں میں سرچ اینڈ ریسکیو آپریشن کے لیے روانہ کر دیا گیا ہے جب کہ اربن سرچ اینڈ ریسکیو ٹیم بھی آرمی چیف کی ہدایات پر میدان میں متحرک ہو چکی ہے۔
سیکیورٹی ذرائع کے مطابق پاک فوج کے ہیلی کاپٹرز اور آرمی ایوی ایشن یونٹس پہلے ہی سے متاثرہ علاقوں میں ریلیف آپریشنز میں حصہ لے رہے ہیں۔
مزید پڑھیں: خیبرپختونخوا میں سیلاب کے باعث جانی نقصان، صوبائی حکومت کا کل یوم سوگ منانے کا اعلان
ذرائع کا کہنا ہے کہ پاک فوج مشکل کی ہر گھڑی میں خیبر پختونخوا کے بہادر عوام کے شانہ بشانہ کھڑی ہے اور کسی بھی قسم کی قربانی سے دریغ نہیں کیا جائے گا۔
