وزیراعظم شہباز شریف نے کہا ہے کہ پاکستان اس وقت کٹھن مرحلے سے گزر رہا ہے اور حالیہ بارشوں اور سیلاب نے ملک کے مختلف حصوں میں بھاری جانی و مالی نقصان پہنچایا ہے۔
انہوں نے کہا کہ پاک فوج، ریسکیو ادارے اور فلاحی تنظیمیں بالخصوص ‘الخدمت‘ متاثرین کی مدد کے لیے دن رات مصروف عمل ہیں، جبکہ وفاقی وزرا متاثرہ علاقوں میں امدادی سرگرمیوں کی نگرانی کر رہے ہیں۔ انہوں نے سیلاب سے متاثرہ علاقوں کے دورے کا بھی اعلان کردیا۔
یہ بھی پڑھیے: خیبر پختونخوا: سیلاب سے 427 مویشی بھی ہلاک، ’مویشیوں کے بغیر گزر بسر مشکل ہے‘
وزیر اعظم کا کہنا تھا کہ سیلاب متاثرین کو محفوظ مقامات پر منتقل کیا جا رہا ہے اور خوراک سمیت ضروری اشیائے خورونوش کی فراہمی یقینی بنائی جا رہی ہے۔ انہوں نے مزید ہدایت کی کہ متاثرہ علاقوں میں آئندہ 10 روز تک بجلی کی بلا تعطل فراہمی یقینی بنائی جائے تاکہ متاثرین کو مزید مشکلات کا سامنا نہ ہو۔
شہباز شریف نے اعلان کیا کہ وہ کل ذاتی طور پر سیلاب سے متاثرہ علاقوں کا دورہ کریں گے اور امدادی کاموں کا جائزہ لیں گے۔ انہوں نے مشکل وقت میں خدمت انجام دینے والے ریسکیو ٹیموں، اداروں اور فوج کے ساتھ ساتھ عوامی خدمت میں پیش پیش فلاحی تنظیموں کا شکریہ بھی ادا کیا۔
