پاکستان نے بھارت کے لیے اپنی فضائی حدود کی بندش مزید ایک ماہ کے لیے برقرار رکھنے کا فیصلہ کیا ہے، جس کے لیے نیا نوٹم بھی جاری کردیا گیا ہے۔
پاکستان سول ایوی ایشن اتھارٹی کے مطابق بھارتی پروازوں پر عائد اس پابندی میں 23 ستمبر تک توسیع کردی گئی ہے۔
یہ بھی پڑھیں: پاکستانی فضائی حدود کی بندش: ایئر انڈیا کا امریکا کے لیے فضائی سروس معطل کرنے کا اعلان
پی اے اے حکام کے مطابق بھارتی طیارے تاحال پاکستانی فضائی حدود استعمال نہیں کرسکیں گے۔
واضح رہے کہ پاکستان نے بھارتی پروازوں کے لیے 23 اپریل سے فضائی حدود بند کر رکھی ہے، جسے وقفے وقفے سے بڑھایا جارہا ہے۔
ذرائع کے مطابق اس مسلسل بندش کے باعث بھارتی سرکاری اور نجی ایئر لائنز کو اب تک 65 ارب روپے سے زیادہ کے مالی نقصان کا سامنا کرنا پڑا ہے۔
پاکستان اور بھارت کے درمیان تعلقات اس وقت کشیدہ ہوئے جب مقبوضہ کشمیر کے علاقے پہلگام میں سیاحوں پر حملے کے بعد بھارت نے یکطرفہ طور پر اس کا الزام پاکستان پر لگا کر سندھ طاس معاہدہ معطل کردیا۔
یہ بھی پڑھیں: علاقائی کشیدگی: پاکستانی فضائی حدود غیر ملکی ایئرلائنز کا متبادل راستہ بن گئی
بھارت نے اس حملے کا الزام پاکستان پر عائد کرنے کے بعد 6 اور 7 مئی کی رات کو پاکستان پر حملہ کیا، جس کا پاکستان کی جانب سے بھرپور جواب دیا گیا، اور 10 مئی کو امریکی صدر ڈونلڈ ٹرمپ کی ثالثی میں جنگ بندی ہوئی۔
