پاکستان کی نیشنل سائبر کرائم انویسٹی گیشن ایجنسی (این سی سی آئی اے) کا کہنا ہے کہ معروف یوٹیوبر ڈکی بھائی بیٹنگ ایپ کی ایک پروموشن کے 10 سے 20 ہزار ڈالر لیتے تھے۔
ایڈیشنل ڈائریکٹر این سی سی آئی اے محمد سرفراز چوہدری نے بتایا کہ یہ 6 سے 16 سالہ بچوں کے مستقبل سے کھیل رہے تھے، بچوں کو پڑھائی کے بجائے جوئے کی لت پر لگا رہے تھے۔ مختلف گیمنگ ایپس کے ذریعے انہوں نے مقبولیت حاصل کی اور مقبولیت کے بعد باہر کے بڑے بڑے جواریوں سے اربوں روپیہ لینا شروع کر دیا اور ان کی ایپس کی پروموشن شروع کر دی۔
یہ بھی پڑھیں: جوئے کی تشہیر کا معاملہ، ڈکی بھائی کے بعد رجب بٹ سمیت کئی بڑے یوٹیوبرز کے خلاف کارروائی شروع
انہوں نے کہا کہ یہ سب دیکھتے ہوئے ریاست نے ایکشن لیا اور انکوائری شروع کی۔ سائبر پیٹرولنگ ٹیم تشکیل دی گئی. اس ٹیم نے تمام یو ٹیوبرز کی شناخت کی اور اس کے بعد ہم نے اس پر کارروائی شروع کی۔
محمد سرفراز چوہدری نے بتایا کہ 40 سے زیادہ جوئے کی ایپلی کشنز ہیں اور ان کا مرکز انڈیا ہے جو اس کو پوری دنیا میں پروموٹ کر رہا ہے کیونکہ ان کی اکانومی جوئے پر چلتی ہے۔ ان کا کہنا تھا کہ ہم کسی کو معافی نہیں دیں گے۔ جو یوٹیوبرز یا سوشل میڈیا انفلیوئنسرز اس طرح کا کام کریں گے ہم ان کو گرفتار کریں گے۔
یہ بھی پڑھیں: جب ڈکی بھائی عدالت سے باہر آئے تو لوگوں نے کیا حال کیا؟
یاد رہے کہ یوٹیوبر ڈکی بھائی کو نوجوانوں میں جوئے سے متعلق ایپس کی تشہیر کرنے کے الزام میں اس وقت گرفتار کیا گیا جب وہ اپنی اہلیہ کے ہمراہ بیرونِ ملک روانہ ہو رہے تھے۔ پہلے عدالت نے ان کا 2 روزہ جسمانی ریمانڈ منظور کیا جو مکمل ہونے کے بعد منگل کو عدالت نے ڈکی بھائی کا مزید 4 روزہ جسمانی ریمانڈ منظور کیا۔
این سی سی آئی اے نے ان کی گرفتاری کے بعد دیگر یوٹیوبرز اور سوشل میڈیا شخصیات کے خلاف بھی کارروائی کا دائرہ وسیع کر دیا ہے۔ ایڈیشنل ڈائریکٹر این سی سی آئی اے کے مطابق اس کیس میں کل 6 افراد شامل ہیں، جن میں کچھ خواتین بھی شامل ہیں، تاہم دیگر ناموں کے حوالے سے انہوں نے تفصیلات دینے سے گریز کیا۔
