’سِسٹرولوجی‘ کے نام سے یوٹیوب چینل چلانے والی معروف پاکستانی یوٹیوبر اقرا کنول کا ڈکی بھائی کی گرفتاری پر مؤقف سامنے آگیا۔
اپنے ایک وی لاگ میں انہوں نے کہاکہ ہم ڈکی بھائی کی گرفتاری پر ہم اپنی رائے اس لیے نہیں دے رہے کیوں کہ ہمیں تفصیل سے معلوم ہی نہیں کہ ہوا کیا ہے۔ ملک کے ادارے بہترین طریقے سے اپنا کام کررہے ہیں۔
یہ بھی پڑھیں: ڈکی بھائی کے بعد سسٹرولوجی کا گھر خریدنے کا راز فاش، پراپرٹی ڈیلر نے پول کھول دیا
واضح رہے کہ معروف یوٹیوبر ڈکی بھائی جوئے کی غیر رجسٹرڈ ایپس کی تشہیر کے مقدمے میں گرفتار ہیں، اور اس وقت وہ جسمانی ریمانڈ پر ہیں۔
این سی سی آئی اے کے مطابق ڈکی بھائی نے اپنے یوٹیوب اور دیگر سوشل میڈیا پلیٹ فارمز کے ذریعے غیر رجسٹرڈ جوا ایپلی کیشنز کی تشہیر کی، جس کے باعث کئی افراد کو مالی نقصان اٹھانا پڑا۔ تفتیش کاروں کے مطابق ملزم کے موبائل سے واٹس ایپ چیٹس اور ادائیگیوں کے شواہد بھی ملے ہیں جو ان کے ان ایپلی کیشنز کے ساتھ روابط کو ثابت کرتے ہیں۔
ایڈیشنل ڈائریکٹر این سی سی آئی اے محمد سرفراز چوہدری نے حالیہ بیان میں انکشاف کیاکہ صرف ڈکی بھائی اور رجب بٹ ہی نہیں بلکہ مزید افراد بھی زیرِ تفتیش ہیں۔
محمد سرفراز چوہدری نے حال ہی میں ایک پوڈکاسٹ میں شرکت کی جہاں ان سے ڈکی بھائی سے متعلق سوالات کیے گئے تو انہوں نے بتایا کہ ڈکی بھائی کو گرفتار کرنے سے قبل انہیں 2 نوٹسز جاری کیے گئے تھے جبکہ رجب بٹ کو بھی نوٹس بھیجے گئے تھے، کیونکہ ان کے خلاف آن لائن جوئے کی تشہیر اور توہین مذہب کے الزامات پر انکوائری جاری ہے۔
یہ بھی پڑھیں: ‘مجھے ایسا نہیں کرنا چاہیے تھا’، یوٹیوبر ڈکی بھائی نے معافی مانگ لی
دوسری جانب ڈکی بھائی نے عدالت میں پیشی کے دوران اپنے کیے معذرت کرتے ہوئے کہاکہ وہ ماضی میں غیراخلاقی ویڈیوز بناتے رہے ہیں، جس پر وہ پوری قوم سے معافی مانگتے ہیں۔
