فیفا اور ایشین فٹبال کنفیڈریشن نے آل انڈیا فٹبال فیڈریشن کو 30 اکتوبر تک نیا آئین نافذ کرنے کی ہدایت کی ہے، بصورتِ دیگر بھارت کو عالمی فٹبال سے معطل کیا جا سکتا ہے۔
فیفا اور ایشین فٹبال کنفیڈریشن نے آل انڈیا فٹبال فیڈریشن کے صدر کلیان چوبے کو خط لکھتے ہوئے کہا ہے کہ آئین کو حتمی شکل دینے میں مسلسل تاخیر پر گہری تشویش ہے اور اگر مقررہ مدت پوری نہ کی گئی تو معاملہ فیفا کے متعلقہ فورم کو بھیج دیا جائے گا۔
یہ بھی پڑھیں:ثانیہ مرزا کا بیٹا ماہر فٹبالر بننے کے لیے کوشاں
خط میں یہ بھی کہا گیا کہ آل انڈیا فٹبال فیڈریشن کو اسے فوری اور لازمی ہدایت سمجھنا ہوگا تاکہ اپنی رکنیت کے حقوق محفوظ رکھ سکے۔
واضح رہے کہ بھارت کا آئین 2017 سے بھارتی سپریم کورٹ میں التوا کا شکار ہے، لہذا معطلی کی صورت میں بھارت کی قومی ٹیمیں اور کلبز تمام بین الاقوامی مقابلوں سے باہر ہو جائیں گے۔
مزید پڑھیں: اسرائیلی حملے میں شہید فلسطینی فٹبالر کی یاد میں یوئیفا کا بیان تنقید کی زد میں
یاد رہے کہ فیفا نے اگست 2022 میں بھی ’تھرڈ پارٹی انٹرفیئرنس‘ پر بھارت کو معطل کیا تھا، تاہم چند دن بعد پابندی ہٹا لی گئی تھی۔
ادھر بھارت کی پروفیشنل فٹبال بھی شدید بحران سے دوچار ہے، انڈین سپر لیگ کا آغاز تاخیر کا شکار ہے اور ہزاروں کھلاڑیوں سمیت عملہ بے روزگاری کے خدشے میں مبتلا ہے، فی الحال اے آئی ایف ایف اور لیگ کے کمرشل پارٹنر کے درمیان معاہدہ 8 دسمبر کو ختم ہو رہا ہے اور اس کی تجدید بھی تاحال نہیں ہو سکی۔
