وزیراعلیٰ پنجاب مریم نواز نے کہا ہے کہ حالیہ سیلاب کے بعد پنجاب پر کافی انگلیاں اٹھائی جارہی ہیں، بلاول بھٹو زرداری اپنی پارٹی کے ترجمانوں کو سمجھائیں، میں پنجاب کی جانب اٹھنے والی انگلی توڑ دوں گی۔
یہ بھی پڑھیں: وزیراعلی پنجاب مریم نواز جنوبی پنجاب کے ایم پی ایز سے کیوں ناراض ہیں؟
ڈیرہ غازی خان میں الیکٹرک بسوں کی افتتاعی تقریب سے خطاب کرتے ہوئے وزیراعلیٰ پنجاب مریم نواز نے کہا کہ میں سینٹرل یا ساؤتھ نہیں پورے پنجاب کی وزیراعلیٰ ہیں، بار بار پنجاب کا نام لے کر لکیر کھینچنے کی بات کی جارہی ہے، جو جنوبی پنجاب کی بات کرتے ہیں ان کو بھی اقتدار ملا، انہوں نے کچھ نہیں کیا۔
ڈی جی خان آلو میں اج تواڈے کول آ کے بہوں خوش تھئی آں , تہاکوں ڈیکھ کے میڈا ہاں ٹھر گئے , یہ چادر جو میں نے اوڑھی ہے یہ ایک غریب خاتون نے میرے لیے اپنے ہاتھ سے بنا کے بھیجی ہے۔
وزیراعلیٰ پنجاب مریم نواز#ElectroBusInDGKhan pic.twitter.com/V2xF4M0tAY
— PMLN (@pmln_org) September 25, 2025
انہوں نے کہا کہ سندھ کا کیا حال ہے میں اس پر بات نہیں کرنا چاہتی، بلاول میرے چھوٹے بھائی ہیں وہ پیپلز پارٹی کے رہنماؤں کو سمجھائیں، بینظیر انکم اسپورٹ پروگرام سے 10ہزار ملتا ہے، ہم جس کا گھر گرا اسے 10لاکھ دے رہے ہیں۔
انہوں نے کہا کہ ’میرے 3 بچے جنید، مہرالنسا اور ماہ نور ہیں، سینٹرل پنجاب میرے لیے ماہ نور، نارتھ پنجاب میرے لیے مہرالنسا اور ساؤتھ پنجاب میرے لیے جنید ہے، جیسے ایک ماں اپنے بچوں میں تفریق نہیں کرتی اسی طرح میں اپنے صوبے کے عوام میں فرق نہیں کرسکتی۔‘
وزیر اعلیٰ مریم نواز شریف ڈیرہ غازی خان میں الیکٹرو بس پراجیکٹ کی افتتاحی تقریب سے خطاب کررہی ہیں https://t.co/iR61FMcLzH
— PMLN (@pmln_org) September 25, 2025
انہوں نے کہا کہ جو سینٹرل، ساؤتھ، نارتھ پنجاب کی بات کرتے ہیں وہ پاکستان کے عوام کے دوست نہیں ہیں، ان کو اقتدار چاہیے، دوسرا آج کل ہر کوئی پنجاب پر انگلی اٹھا رہا ہے،میں پنجاب کے عوام کی ذمہ دار ہوں، پنجاب کی جانب اٹھنے والی انگلی توڑ دوں گی۔
مریم نواز نے کہا کہ پنجاب نے اپنے دل اور خزانے کے دروازے باقی صوبوں کے لیے کھولے ہیں، این ایف سی سب صوبوں کو اپنی آبادی کے حساب سے برابر ملتا ہے لیکن پنجاب اس میں سے باقی صوبوں کو بھی دیتا ہے اور دینا بھی چاہیے، اگر آج پنجاب میں کینسر کا جدید علاج آیا ہے تو ہم نے اپنے دروازے کھول دیے ہیں کہ کوئی بھی پاکستانی آکر علاج کرا سکتا ہے، سندھ، پنجاب، خیبرپختونخوا، گلگت بلتستان اور آزاد کشمیر کے عوام بھی آسکتے ہیں۔
یہ بھی پڑھیں: سیلاب متاثرہ علاقوں میں سڑکوں کی ہنگامی بحالی، مریم نواز کی خصوصی ہدایت
انہوں نے کہا کہ پنجاب میں ابھی تاریخ کا بدترین سیلاب آیا، 3دریاؤں میں سیلاب آیا، اس کے علاوہ 4 مہینوں سے پنجاب میں بارشیں ہورہی ہیں، پیپلز پارٹی ہماری اتحادی ہے لیکن افسوس کے ساتھ کہنا پڑتا ہے کہ پیپلز پارٹی والوں نے پنجاب کے سیلاب پر سیاست کی، میں آصف علی زرداری اور بلاول کو کہنا چاہتی ہوں کہ وہ اپنی پارٹی کے ترجمانوں کو سمجھائیں۔
مریم نواز نے کہا کہ ڈی جی خان ڈویژن کیلیے 101 بسیں چلیں گی، لیہ، مظفرگڑھ، راجن پور، تونسہ، کوٹ ادو میں ای بسیں چلیں گی، ماحول دوست بسوں میں خواتین، طلبہ، بزرگوں کیلیے مفت سفر ہوگا، معذور اور خصوصی افراد کیلیے بسوں میں ریمپ کی سہولت موجود ہے، خواتین کیلیے بسوں میں محفوظ اور باعزت الگ جگہ ہے۔
وزیراعلیٰ نے کہا کہ بارڈر ملٹری پولیس میں پہلی بار خواتین کی شمولیت سے خوشی ہوئی، تمام شہروں کو یکساں ترقی کے مواقع فراہم کیے جارہے ہیں۔
