وزیراعلیٰ پنجاب مریم نواز نے کہا ہے کہ پنجاب کی ترقی سے جلنے والوں کے دماغ کی صفائی کررہی ہوں۔ میں تو سندھ، بلوچستان اور خیبرپختونخوا کو بھی ترقی کرتا دیکھنا چاہتی ہوں، عوام اپنی حکومتوں سے ضرور سوال کریں۔
لاہور میں تقریب سے خطاب کرتے ہوئے انہوں نے کہاکہ مریم نواز پنجاب کی بات نہیں کرے گی تو کون کرےگا، اگر لوگوں کو اپنے اپنے علاقوں میں سہولیات میسر نہیں ہیں تو اپنی حکومتوں سے پوچھیں۔
میں نے پنجاب کی ترقی سے جلنے والوں کے دماغ کی بھی صفائی کر دی۔ وزیراعلیٰ مریم نواز pic.twitter.com/8rFc0NpdQP
— WE News (@WENewsPk) October 7, 2025
یہ بھی پڑھیں: سیاسی کشیدگی: مسلم لیگ ن اور پیپلزپارٹی کا افہام و تفہیم کے ذریعے مسائل حل کرنے پر اتفاق
انہوں نے کہاکہ ستھرا پنجاب کی جیکٹ پہننا میرے لیے اعزاز سے کم نہیں، سیلاب کے بعد ستھرا پنجاب کی ٹیم نے صوبے کو چمکا دیا ہے۔ راشن کارڈ کے ذریعے 3 ہزار روپے ماہانہ ستھرا پنجاب کے ورکرز کو دیے جائیں گے۔
انہوں نے کہاکہ سیلابی صورت حال کے دوران حکومت پنجاب اور انتظامیہ نے ایک ٹیم بن کر کام کیا، ستھرا پنجاب کے ورکرز نے انسانی بند بنا کر پانی کو روکا ہوا تھا، جو ایک مثال ہے۔
مریم نواز نے کہاکہ یہ نہ کہنا کہ آپ کام کررہے ہیں اور میں آپ کو دیکھ نہیں رہی، یہ وردی پن کر پیغام دیا ہے کہ ہم سب ایک ہی ہیں۔
انہوں نے کہاکہ شہروں اور دیہات میں صفائی پروگرام کا آغاز مثالی ہے، اگر میں پولیس کی وردی پہن سکتی ہوں تو ستھرا پنجاب کی جیکٹ کیوں نہیں؟
وزیراعلیٰ نے کہاکہ پنجاب میں پی ٹی آئی کے دور میں تباہی آئی، ان کے دور میں سڑکوں سمیت ہر جگہ پر گندگی کے ڈھیر پڑے ہوتے تھے۔
مریم نواز نے کہاکہ گوگی اور پنکی کے دور میں صوبے میں اتنی تباہی آئی کہ پنجاب کی ہر گلی میں کچرا پڑا ہوتا تھا، لیکن اب صورت حال بدل چکی ہے۔
انہوں نے کہاکہ وہ خواب آج ایک حققیت بن چکا ہے، جو میں نے ایک سال قبل دیکھا تھا، ستھرا پنجاب پروگرام 35 ہزار مشینری اور ایک لاکھ فورسز کے ساتھ بڑا پروگرام ہے۔
وزیراعلیٰ نے کہاکہ قربانی کی عید کے موقع پر جگہ جگہ آلائشیں پڑی ہوتی تھیں، لیکن اس بار کسی کو کہیں پر گندگی نظر نہیں آئی۔ اس پروگرام کے لیے متعلقہ وزیر ذیشان رفیق کو مبارکباد دیتی ہوں۔
یہ بھی پڑھیں: آپ ہماری بہن اور بیٹی ہیں، اپنا لہجہ درست کریں، قمر زمان کائرہ کا مریم نواز کو مشورہ
انہوں نے کہاکہ ہم نے پنجاب میں کرائم کو کنٹرول کرنے کے لیے بھی اقدامات کیے، جس کی وجہ سے صورت حال میں بہتری آئی ہے۔
مریم نواز نے کہاکہ ’کرائم کنٹرول ڈیپارٹمنٹ‘ کے قیام کے بعد اب کوئی خواتین کے ساتھ زیادتی کی جرات نہیں کر سکتا۔
