سال 2025 کا نوبل انعام برائے کیمسٹری جاپان، آسٹریلیا اور امریکا کے 3 سائنسدانوں کو ان کے ‘ میٹل آرگینک فریم ورکس‘ پر تحقیق کے اعتراف میں دیا گیا ہے۔
نوبل کمیٹی کے مطابق انعام یافتگان میں
پروفیسر سوسومو کیٹاگاوا کیوٹو یونیورسٹی، جاپان
پروفیسر رچرڈ رابسن یونیورسٹی آف میلبورن، آسٹریلیا
پروفیسر عمر ایم. یاغی یونیورسٹی آف کیلیفورنیا، برکلے، امریکا
شامل ہیں۔
واضح رہے کہ پروفیسر عمر ایم یاغی فلسطینی مہاجر خاندان کے چشم و چراغ ہیں جو اردن میں پیدا ہوئے۔
کیمیائی ڈھانچوں میں انقلاب
تینوں سائنسدانوں نے میٹل آرگینک فریم ورکس (MOFs) پر بنیادی تحقیق کی، جو دھاتوں اور نامیاتی اجزا پر مشتمل ایسے مادے ہیں جو گیسوں، توانائی اور دواؤں کے محفوظ ذخیرہ و استعمال میں مددگار ثابت ہو رہے ہیں۔
یہ دریافت جدید ماحولیاتی ٹیکنالوجی، صاف توانائی، اور کیمیائی سینسرز کی تیاری میں اہم سنگِ میل سمجھی جا رہی ہے۔
نوبل انعامات کی تاریخ
1901 سے 2024 تک کیمسٹری کے 116 نوبل انعامات دیے جا چکے ہیں، جن میں 197 سائنسدان شامل ہیں۔
ان میں 8 خواتین بھی شامل ہیں، جن میں سب سے معروف میری کیوری ہیں جنہوں نے 1911 میں یہ اعزاز حاصل کیا۔
گزشتہ سال کا انعام
2024 میں نوبل انعام ڈیوڈ بیکر (یونیورسٹی آف واشنگٹن) اور ڈیماس ہسابیس و جان جمپر (گوگل ڈیپ مائنڈ) کو دیا گیا تھا۔
انہوں نے مصنوعی ذہانت (AI) کے ذریعے پروٹینز کے ڈھانچے کی پیش گوئی اور نئی پروٹینز کی تخلیق کے طریقے ایجاد کیے۔
دیگر نوبل انعامات کب ملیں گے؟
اس ہفتے طب اور طبیعات (فزکس) کے نوبل انعامات کا اعلان کیا جا چکا ہے،
جبکہ ادب، امن اور معیشت کے انعامات آئندہ دنوں میں متوقع ہیں۔
تمام نوبل انعام یافتگان کو دسمبر میں سویڈن میں منعقدہ تقریب میں ایوارڈز دیے جائیں گے۔
اردن کے شاہ عبداللہ دوم کا عمر یاغی کو خراجِ تحسین
اردن کے بادشاہ شاہ عبداللہ دوم نے بدھ کے روز فلسطینی نژاد اردنی امریکی سائنسدان پروفیسر عمر یاغی کو کیمسٹری کے شعبے میں نوبیل انعام جیتنے پر مبارکباد پیش کی۔
نفخر ونعتز بالعالم الأردني البروفيسور عمر ياغي، ونبارك له وللأردن فوزه بجائزة نوبل للكيمياء لعام 2025. هذا الإنجاز فخر جديد يضاف إلى سجل الأردنيين المشرف في مختلف الميادين حول العالم، ويثبت أن الأردني قادر على إحداث الفارق أينما تواجد
— عبدالله بن الحسين (@KingAbdullahII) October 8, 2025
شاہ عبداللہ دوم نے سماجی رابطے کی ویب سائٹ ’ایکس‘ (سابقہ ٹوئٹر) پر اپنے پیغام میں کہا ’اردنی سائنسدان پروفیسر عمر یاغی پر فخر ہے جنہوں نے 2025 کا نوبیل انعام برائے کیمسٹری جیتا۔ ان کی یہ کامیابی اردن کے لیے باعثِ فخر ہے اور یہ ثابت کرتی ہے کہ اردنی دنیا کے کسی بھی حصے میں ہوں، اپنی محنت اور علم سے فرق پیدا کر سکتے ہیں۔‘
عمر یاغی کے کام کو عالمی سطح پر ماحولیاتی سائنس، توانائی کے ذخیرے، اور کاربن کے اخراج میں کمی کے شعبوں میں گراں قدر سمجھا جا رہا ہے۔
