وزیر اعظم محمد شہباز شریف نے کہا ہے کہ پاکستان اور سعودی عرب کے درمیان دفاعی معاہدہ باہمی بھائی چارے پر مبنی ہے، اور اگر دونوں ممالک مل کر کام کریں تو عالمی برادری میں مضبوط مقام پیدا کیا جا سکتا ہے، موجودہ وقت پاکستان کے لیے سنہری مواقع لے کر آیا ہے۔
یہ بھی پڑھیں: امت مسلمہ اسلامی اقدار پر عمل کرکے کھویا ہوا مقام دوبارہ حاصل کر سکتی ہے، وزیراعظم شہباز شریف
وزیر اعظم بدھ کو اسلام آباد میں سعودی پاکستان جوائنٹ بزنس کونسل کے چیئرمین شہزادہ منصور بن محمد بن سعد آل سعود اور ان کے وفد کے اعزاز میں ظہرانے سے خطاب کر رہے تھے۔ تقریب میں نائب وزیر اعظم و وزیر خارجہ سینیٹر اسحاق ڈار، وفاقی وزراء، اعلیٰ سرکاری حکام اور کاروباری شخصیات شریک تھیں۔
شہباز شریف نے کہا کہ وہ گزشتہ 40 سال سے سیاست میں ہیں اور پہلی بار 60 کی دہائی میں سعودی عرب گئے تھے، لیکن حالیہ دورہ ریاض بالکل منفرد اور تاریخی تھا۔ انہوں نے کہا کہ سعودی ولی عہد شہزادہ محمد بن سلمان نے نہایت گرمجوشی کا مظاہرہ کیا اور سعودی عوام نے ہمیشہ پاکستان کے لیے بے مثال محبت دکھائی۔
وزیراعظم محمد شہباز شریف کا سعودی وفد کے اعزاز میں منعقدہ ظہرانے سے خطاب https://t.co/prVUKCwiyZ
— PMLN (@pmln_org) October 8, 2025
وزیر اعظم نے کہا کہ سعودی عرب کا پاکستان سے تعلق غیر متزلزل عزم پر مبنی ہے، جو دونوں ممالک کے تاریخی تعلقات کا بنیادی ستون ہے۔ انہوں نے کہا کہ پاکستان اور سعودی عرب حقیقی بھائی ہیں، اور ہم مقدس مقامات مکہ مکرمہ و مدینہ منورہ کے ہمیشہ محافظ رہیں گے۔
انہوں نے کہا کہ دونوں ممالک کاروبار، سرمایہ کاری، تحقیق اور ترقی کے شعبوں میں مشترکہ تعاون کو فروغ دیں گے۔ سعودی عرب کی متحرک قیادت کے وژن سے بہت کچھ سیکھنے کی ضرورت ہے، وقت کسی کا انتظار نہیں کرتا، لہٰذا ہمیں مواقع سے فائدہ اٹھانے کے لیے تیار رہنا ہوگا۔
یہ بھی پڑھیں: سعودی عرب اور پاکستان کے درمیان تاریخی دفاعی معاہدہ کی تفصیلات
وزیر اعظم نے کہا کہ پاکستان کے پاس بہترین انسانی وسائل موجود ہیں، سعودی حکام معاہدوں پر دستخط کے لیے پرجوش ہیں، اور اب ہمیں عملی طور پر مل کر کام کا آغاز کرنا ہوگا۔
’سعودی کاروباری طبقے کو پاکستان میں سرمایہ کاری کے لیے بھرپور سہولتیں فراہم کی جائیں گی‘
سعودی پاکستان جوائنٹ بزنس کونسل کے چیئرمین شہزادہ منصور بن محمد بن سعد آل سعود نے کہا کہ وہ پاکستان سعودی مشترکہ بزنس کونسل اجلاس کے لیے آئے ہیں۔ انہوں نے پاکستان آمد سے قبل سعودی وزرا سے ملاقاتیں کیں اور انہیں پاکستان میں ممکنہ اسٹریٹجک منصوبوں سے آگاہ کیا۔ شہزادہ منصور نے یقین دلایا کہ سعودی کاروباری طبقے کو پاکستان میں سرمایہ کاری کے لیے بھرپور سہولتیں فراہم کی جائیں گی۔
