لاہور میں تمام سرکاری و نجی اسکولوں میں فوری طور پر چھٹی دے دی گئی ہے۔
ترجمان سی ای او ایجوکیشن لاہور کے مطابق اسکول انتظامیہ کی جانب سے والدین کو فوری طور پر آگاہ کیا جا رہا ہے۔
حکام کا کہنا ہے کہ شہری راستوں کی بندش کے باعث تعلیمی اداروں کو بند کرنے کا فیصلہ کیا گیا۔
اس سے قبل راولپنڈی کے بیشتر نجی تعلیمی اداروں میں بھی تدریسی سرگرمیاں معطل کر دی گئی تھیں۔
یہ بھی پڑھیے اقصیٰ مارچ: ٹی ایل پی کے کارکنان کے خلاف پولیس نے کریک ڈاؤن کیوں کیا؟
دوسری جانب اسلام آباد میں مذہبی جماعت کے اعلان کردہ احتجاج کے پیشِ نظر سیکیورٹی ہائی الرٹ کر دی گئی ہے۔
ذرائع کے مطابق اسلام آباد کے داخلی راستوں پر کنٹینرز لگا دیے گئے ہیں جس سے شہریوں کو آمد و رفت میں شدید مشکلات کا سامنا ہے، جب کہ موبائل ڈیٹا سروس بھی متاثر ہونے کی اطلاعات ہیں۔
اسلام آباد اور راولپنڈی کے تعلیمی ادارے بھی بند
تحریک لبیک پاکستان (ٹی ایل پی) کے احتجاج کے باعث اسلام آباد اور راولپنڈی کی ضلعی انتظامیہ نے آج تمام سرکاری و نجی تعلیمی ادارے بند رکھنے کا اعلان کیا ہے۔
یہ اعلان اُس وقت کیا گیا جب کئی اسکولوں میں تدریسی سرگرمیاں پہلے ہی شروع ہو چکی تھیں، جس کے باعث والدین اور طلبا کو سخت مشکلات کا سامنا کرنا پڑا۔
یہ بھی پڑھیے پنجاب بھر میں کریک ڈاؤن، جڑواں شہروں میں اسکولز بند، ٹی ایل پی کا آج دوپہر اسلام آباد کے لیے روانگی کا اعلان
انتظامیہ کے مطابق، موجودہ سیکیورٹی صورتحال کے پیش نظر احتیاطی اقدام کے طور پر یہ فیصلہ کیا گیا ہے۔
ادھر پرائیویٹ اسکولز ایسوسی ایشن نے بھی اپنے تمام نجی اسکول بند رکھنے کے فیصلے کو برقرار رکھا ہے، مؤقف اختیار کیا گیا ہے کہ طلبا کی حفاظت اولین ترجیح ہے، اس لیے کسی قسم کا رسک نہیں لیا جا سکتا۔
شہریوں اور والدین نے انتظامیہ کے تاخیر سے فیصلے پر اظہارِ افسوس کرتے ہوئے کہا کہ اچانک چھٹی کے اعلان سے بچوں اور والدین کو غیر معمولی پریشانی کا سامنا کرنا پڑا۔
