خیبر پختونخوا کے نئے وزیراعلیٰ سہیل آفریدی نے صوبے میں پائیدار امن کے قیام کے لیے 25 اکتوبر کو ضلع خیبر میں ایک بڑے امن جرگے کے انعقاد کا اعلان کردیا۔
سہیل آفریدی نے سماجی رابطے کی ویب سائٹ ’ایکس‘ پر اپنے پیغام میں انہوں نے کہاکہ امن کے فروغ کے لیے قبائلی عمائدین، سیاسی و سماجی رہنماؤں اور نوجوانوں پر مشتمل ایک وسیع البنیاد جرگہ 25 اکتوبر تحصیل باڑہ ضلع خیبر میں منعقد ہوگا۔
خیبر پختونخواہ کے عوام کی زندگی اور ان کے مستقبل کا فیصلہ صوبے کے لوگ خود کریں گے۔ کسی کو بھی بند کمروں کے فیصلوں کو عوام پر مسلط کرنے کی اجازت نہیں دی جائے گی۔ اس سلسلے میں قیام امن کے لیے بروز ہفتہ ۲۵ اکتوبر ۲۰۲۵ ضلع خیبرتحصیل باڑہ میں تمام سیاسی وابستگیوں سے بالاتر ہو کر…
— Sohail Afridi (@SohailAfridiISF) October 19, 2025
ان کے مطابق یہ جرگہ مکمل طور پر غیر سیاسی نوعیت کا ہوگا اور اس کا مقصد صرف صوبے میں امن و استحکام کا فروغ ہے۔
وزیرِاعلیٰ نے اپنے بیان میں زور دیا کہ خیبر پختونخوا کے معاملات پر فیصلے عوام کی امنگوں کے مطابق ہونے چاہییں۔ صوبے کے عوام اپنے مستقبل اور طرزِ زندگی سے متعلق فیصلے خود کریں گے، کسی کو بھی یہ اختیار نہیں دیا جائے گا کہ وہ بند کمروں میں طے شدہ فیصلے عوام پر مسلط کرے۔
انہوں نے مزید کہاکہ خیبر پختونخوا کی حکومت پاکستان تحریک انصاف کے بانی عمران خان کے نظریے اور عوامی مفادات کے ساتھ مضبوطی سے کھڑی ہے۔
واضح رہے کہ وزیرِاعلیٰ سہیل آفریدی نے حلف اٹھانے کے بعد پی ٹی آئی کے بانی عمران خان سے اڈیالہ جیل میں ملاقات کے لیے اسلام آباد ہائی کورٹ سے رجوع کیا تھا۔ تاہم عدالت نے ان کی درخواست پر ابتدائی اعتراضات عائد کر دیے ہیں۔
اب جسٹس ارباب محمد طاہر پیر کے روز رجسٹرار آفس کے اعتراضات کے ساتھ اس درخواست کی سماعت کریں گے۔
یہ بھی پڑھیں: ’سہیل آفریدی میرا اوپننگ بلے باز ہے‘، بانی پی ٹی آئی عمران خان کا وزیراعلیٰ خیبرپختونخوا کے لیے خصوصی پیغام
یہ درخواست نو منتخب وزیرِاعلیٰ خیبر پختونخوا کی جانب سے ایڈووکیٹ جنرل شاہ فیصل کے توسط سے ایڈووکیٹ علی بخاری نے دائر کی تھی۔
درخواست میں مؤقف اپنایا گیا ہے کہ عمران خان سے ملاقات صوبائی حکومت کے امور اور نئی کابینہ کی تشکیل کے حوالے سے مشاورت کے لیے ناگزیر ہے۔
