راولپنڈی کرکٹ اسٹیڈیم میں جاری ٹیسٹ کے دوسرے روز کے اختتام پر جنوبی افریقہ نے اپنی پہلی اننگز میں 4 وکٹوں کے نقصان پر 185 رنز اسکور کرلیے۔
پاکستان کے 333 رنز کے جواب میں مہمان ٹیم نے بیٹنگ کا آغاز کیا تو 22 کے مجموعی اسکور پر ریان ریکلٹن محض 14 رنز بناکر شاہین شاہ آفریدی کی گیند پر آؤٹ ہوگئے۔
یہ بھی پڑھیے: راولپنڈی ٹیسٹ: پاکستان نے پہلے روز 5 وکٹوں کے نقصان پر 259 رنز اسکور کرلیے
ٹونی ڈی زورزی نے 55، کپتان ایڈن مارکرم نے 32 رنز کی اننگز کھیلی جبکہ ڈیوالڈ بریوس بغیر کوئی رن بنائے پویلین لوٹ گئے۔
پاکستان کی جانب سے ڈیبیو کرنے والے اسپنر آصف آفریدی نے شاندار بولنگ کرتے ہوئے 2 کھلاڑیوں کو آؤٹ کیا، جبکہ شاہین شاہ آفریدی اور ساجد خان کے حصے میں ایک ایک وکٹ آئی۔
دن کے اختتام پر ٹرسٹان اسٹبس 68 اور کائل ویرین 10 رنز کے ساتھ کریز پر موجود تھے۔
اس سے قبل پاکستان نے دوسرے روز اپنی پہلی اننگز 259 رنز 5 کھلاڑی آؤٹ سے آگے بڑھائی، تاہم بیٹنگ لائن زیادہ دیر مزاحمت نہ کرسکی۔ سلمان آغا 45 رنز بناکر مہاراج کی گیند پر ایل بی ڈبلیو قرار پائے۔
سعود شکیل نے 66 رنز بنائے مگر وہ بھی مہاراج کا ہی شکار بنے، جب کہ شاہین شاہ آفریدی بغیر کوئی رن بنائے بولڈ ہوگئے۔
اسی اوور میں مہاراج نے ساجد خان (5) اور آصف آفریدی (4) کو بھی پویلین کی راہ دکھائی، یوں وہ پاکستان کے خلاف 7 وکٹیں حاصل کرنے والے دوسرے جنوبی افریقی بولر بن گئے۔
مزید پڑھیں: راولپنڈی کرکٹ اسٹیڈیم میں ٹیسٹ میچز کے دوران جڑواں شہروں کے لیے خصوصی ٹریفک پلان جاری
پاکستانی ٹیم اپنی گزشتہ روز کی اننگز میں صرف 74 رنز کا اضافہ کر سکی۔ کپتان شان مسعود 87، عبداللہ شفیق 57، محمد رضوان 19، امام الحق 17 اور بابر اعظم 16 رنز بناکر نمایاں رہے۔
