ہدایت کار مارٹن سکور سیزی کی فلم ’کلرز آف دی فلاور مون‘ کا پہلا ٹریلر جاری کر دیا گیا ہے۔
فلم کی کہانی اوسیج نیشن کے ارکان کے سلسلہ وار قتل کے بارے میں ہے جو اپنی زمین کے نیچے سے تیل دریافت ہونے کے سبب امیر ہو جاتے ہیں اور پھر ایک ایک کر کے پر اسرار حالت میں مرنے لگتے ہیں۔
اس فلم کی کہانی ڈیوڈ گران جو امریکی صحافی اور سب سے زیادہ فروخت ہونے والی کتابوں کے مصنف ہیں کی 2017کی کتاب کِلرز آف دی فلاور مون:دی اوسیج مرڈرز اینڈ دی برتھ آف دی ایف بی آئی سے لی گئی ہے۔
156منٹ کی اس فلم کی کاسٹ میں رابرٹ ڈی نیرو، جیسی پلیمنز، جان لتھگو، لیو نارڈو ڈی کیپریو، لِلی گلیڈ اسٹون، بہترین اداکار کا آسکر ایوارڈ حاصل کرنے والے برینڈن فریزر اور دیگر اداکار شامل ہیں۔
لیونارڈو ڈی کیپریو نےسماجی رابطے کی ویب سائٹ انسٹا گرام پر ٹریلر کی ویڈیو شیئر کرتے ہوئے لکھا: یہ ایسا پراجیکٹ ہے جس پر مجھے فخر ہے اور میں اسے آپ سب کے ساتھ شیئرکرنے کا انتظار نہیں کر سکتا۔
View this post on Instagram
اس فلم میں لیونارڈو ڈی کیپریو نے ارنسٹ کا کردار ادا کیا ہے جو ایک طاقت ور مقامی شخص کے بھتیجے ہوتے ہیں اور لِلی گلیڈ اسٹون نےارنسٹ کی بیوی مولی کا کردار ادا کیا ہے۔
اگلے ہفتے اس فلم کا ورلڈ پریمیئر کانز فلم فیسٹیول میں ویس اینڈر سن اور جوناتھن گلیز کی فلموں کے ساتھ ہوگا۔
فلم کِلرز آف دی فلاور مون رواں سال 6 اکتوبر کو سینما گھروں کی زینت بنے گی۔
