وفاقی وزیر مملکت برائے داخلہ طلال چوہدری نے کہا ہے کہ اسلام آباد کچہری کے باہر ہونے والے دھماکے کی تحقیقات جاری ہیں، حکومت شہریوں کی حفاظت کے لیے ’سیکیور نیبر ہڈ‘ کے نام سے ایک سروے کرانے جا رہی ہے۔
اسلام آباد میں میڈیا سے گفتگو کرتے ہوئے انہوں نے کہاکہ ’سیکیور نیبر ہوڈ‘ کے نام سے سروے شروع کیا جارہا ہے، جس کے بعد انتظامیہ کو معلوم ہوگا کہ وفاقی دارالحکومت میں کس جگہ پر کون رہ رہا ہے۔
مزید پڑھیں: اسلام آباد پولیس کے خصوصی سیکیورٹی اقدامات، کوئیک ریسپانس ٹیمیں مستعد
انہوں نے کہاکہ اسلام آباد کو محفوظ بنانے کے لیے کئی اقدامات کیے گئے ہیں، اسلام آباد انتظامیہ کی ذمہ داریاں دیگر شہروں سے زیادہ ہیں، کیوں کہ یہاں سفارتکار بھی رہائش پذیر ہیں، اس کے علاوہ آئے روز کانفرنسز ہورہی ہوتی ہیں۔
طلال چوہدری نے کہاکہ اسلام آباد میں گاڑیوں اور موٹرسائیکلوں کے لیے الیکٹرانک ٹیگ لازمی قرار دیا جائےگا، جس کے بعد کسی بھی گاڑی کی مانیٹرنگ کی جا سکے گی۔
انہوں نے کہاکہ اسلام آباد میں آنے والے دنوں میں مزید 5 اسٹار ہوٹلز بنائے جارہے ہیں، جبکہ شہریوں کے لیے کلبز اور ٹیموں کے لیے اسٹیڈیمز بھی بنائے جائیں گے۔
انہوں نے کہاکہ اگلے 2 سال میں اسلام آباد کا انفراسٹرکچر تبدیل دکھائی دے گا، اگلے 6 ماہ میں اسلام آباد میں کوئی بھی ناکا آپ کو نظر نہیں آئے گا۔
اب ہر گھر کی لوکیشن اور افراد کی تفصیل گوگل میپ پر موجود ہوگی، ڈپٹی کمشنر
پریس کانفرنس کے دوران ڈپٹی کمشنر اسلام آباد نے کہاکہ وفاقی دارالحکومت کے ہر گھر کی لوکیشن اور افراد کی تفصیل اب گوگل میپ پر موجود ہوگی۔
انہوں نے کہاکہ شہریوں سے درخواست ہے کہ ’سیکیور نیبر ہڈ‘ سروے کے دوران ٹیموں کے ساتھ تعاون کریں۔
کم سے کم وقت میں شہریوں کا مستند ڈیٹا جمع کیا جائےگا، آئی جی
اس موقع پر آئی جی اسلام آباد نے کہاکہ ’سیکیور نیبر ہڈ‘ کے نام سے پروگرام لانچ کیا جارہا ہے، یہ تمام اقدامات سیف سٹی منصوبے کے تحت اٹھائے جائیں گے۔
مزید پڑھیں: اسلام آباد کی سیکیورٹی پر کوئی سمجھوتا نہیں کیا جائے گا، آئی جی
انہوں نے کہاکہ کم سے کم وقت میں شہریوں کا مستند ڈیٹا جمع کیا جائےگا، اس دوران پولیس ٹیمیں ضلعی انتظامیہ کے ہمراہ ہوں گی۔ گھروں میں آنے والے مہمانوں کا بھی ڈیٹا جمع کیا جائےگا۔
