نقیب اللہ قتل کیس میں اہم پیشرفت، 5 سال سے مفرور 7 ملزمان عدالت کے سامنے پیش ہوگئے۔
کراچی کے نقیب اللہ قتل کیس میں اہم پیش رفت ہوئی ہے، سب انسپکٹر اور شعیب شوٹر سمیت 7 ملزمان نے عدالت کے سامنے سرنڈر کردیا ہے۔
تفصیلات کے مطابق 5سال قبل ’پولیس مقابلے‘ میں جاں بحق ہونے والے نقیب اللہ قتل کیس میں 7 ملزمان مفرور تھے جنہیں عدالت نے اشتہاری قرار دیا ہوا تھا، وہ آج انسداد دہشتگردی عدالت میں پیش ہوگئے ہیں اور عبور ی ضمانت کے لیے درخواست دائرکر دی ہے جبکہ گزشتہ روز ان تمام ساتوں ملزمان نے سندھ ہائیکورٹ سے حفاظتی ضمانت حاصل کی تھی۔
آج پیش ہونے پر انسداد دہشتگردی منتظم عدالت نے ملزمان کی درخواست ضمانت 16 نمبر عدالت منتقل کردی، ملزمان کو جیل میں قائم انسداد دہشتگردی عدالت سے رجوع کرنے کی ہدایت کی گئی ہے۔
ملزمان میں سب انسپکٹرامان اللہ مروت، شعیب شوٹرسمیت 7ملزمان شامل ہیں، ملزمان نقیب اللہ قتل کیس میں مقدمے کی ابتدا سے مفرور تھے۔
واضح رہے کہ نقیب اللہ قتل کیس میں مرکزی ملزم راﺅ انوار سمیت 18 افراد کو عدالت نے بری کر دیا تھا۔
