اسلام آباد میں جمیعت علماء اسلام (ف) میں حال ہی میں شامل ہونے والے فرخ خان کھوکھر کو آج شام خودکار اسلحہ کے لائسنس نہ ہونے پر پولیس نے تحویل میں لے کر تھانہ آبپارہ منتقل کر دیا۔
یہ بھی پڑھیں:زیرو پوائنٹ ناکے پر کارروائی، جے یو آئی رہنما فرخ کھوکھر گرفتار
پولیس کے مطابق انہیں ہدایت کی گئی تھی کہ اگر اسلحہ کا لائسنس پیش نہ کیا گیا تو ناجائز اسلحہ رکھنے کا مقدمہ درج کر کے باضابطہ گرفتاری عمل میں لائی جائے گی۔
فرخ خان کھوکھر نے موقع پر موجود اپنی دوسری گاڑی میں سوار افراد کو فوری طور پر کھوکھر ہاؤس بھیج دیا تاکہ وہ متعلقہ اسلحہ لائسنس لا سکیں۔ خود وہ پولیس کے ہمراہ تھانہ آبپارہ چلے گئے جہاں تقریباً ایک گھنٹے بعد جدید اسلحہ کا لائسنس تھانے میں جمع کرا دیا گیا۔
پولیس نے لائسنس کی تصدیق کے بعد فرخ خان کھوکھر کو باعزت جانے کی اجازت دے دی، جس کے بعد وہ تھانے سے روانہ ہوگئے۔
