پنجاب حکومت کے ’ستھرا پنجاب‘ منصوبے میں شامل خاتون سینیٹری ورکر نے کوڑا دان سے ملنے والے 9 لاکھ روپے مالک کو واپس کر کے ایمانداری کی مثال قائم کردی۔
میڈیا رپورٹس کے مطابق نصرت بی بی صوبے کے چھوٹے بڑے شہروں میں صفائی کا کام کرنے والے ایک لاکھ 30 ہزار ملازمین میں شامل ہیں۔
مزید پڑھیں: ملتان ایئرپورٹ: ڈیوٹی پورٹر نے ایمانداری کی مثال قائم کردی
انہوں نے بتایا کہ جمعرات کی صبح محلہ نگہبان پورہ کی گلی میں کوڑے سے ایک پیکٹ ملا، جسے کھولنے پر نوٹوں کی گڈیاں سامنے آئیں۔
خاتون نے فوراً اپنے سپروائزر کو اطلاع دی، جنہوں نے پیسے کے مالک کو تلاش کرکے رقم واپس کردی۔
اس کارکردگی پر ڈپٹی کمشنر فیصل آباد کیپٹن (ر) ندیم ناصر نے بتایا کہ نصرت بی بی کو مجموعی طور پر 3 لاکھ روپے انعام اور تعریفی سرٹیفکیٹ دیا جا رہا ہے، جبکہ ان کے ایک بیٹے کو ضلعی انتظامیہ میں نوکری بھی دی جا رہی ہے۔
5 بچوں کی ماں نصرت بی بی کا کہنا تھا کہ وہ اور ان کے شوہر نے محنت کرکے بچوں کو پالا ہے اور ہمیشہ رزق حلال کھایا ہے۔
انہوں نے افسران کی جانب سے حوصلہ افزائی پر خوشی کا اظہار کرتے ہوئے کہاکہ میرے لیے یہ سب سے بڑا اعزاز ہے کہ مجھ جیسی غریب کو اتنی عزت دی جا رہی ہے۔
مزید پڑھیں: دیانت داری کی اعلیٰ مثال: پاکستانی معاون نے عراقی خاتون حاجن کا گم شدہ مہنگا فون واپس کردیا
واضح رہے کہ امریکی جریدے فوربز نے حال ہی میں ’ستھرا پنجاب‘ پروگرام کو دنیا کا سب سے بڑا منظم ویسٹ منیجمنٹ سسٹم قرار دیا ہے۔ انتظامیہ کے مطابق اس نظام کے تحت روزانہ قریباً 50 ہزار ٹن کچرا اٹھا کر ٹھکانے لگایا جا رہا ہے۔
