معروف یوٹیوبر سعد الرحمان عرف ڈکی بھائی نے جوا ایپس کیس میں گرفتاری اور پھر رہائی کے بعد قوم سے معافی مانگ لی۔
ڈکی بھائی نے اپنے یوٹیوب چینل پر ایک ویڈیو میں کہاکہ اگر کوئی یہ سمجھے کہ ان کا مقصد ویڈیو کے ذریعے اپنے خلاف درج ایف آئی آر کو جواز دینا ہے تو وہ اس کے لیے معذرت خواہ ہیں۔
مزید پڑھیں: یوٹیوبر ڈکی بھائی رہائی کے بعد اب کیا کریں گے؟ اہلیہ عروب جتوئی کا سوشل میڈیا پر اہم بیان
انہوں نے مزید وضاحت دی کہ اگر ان کے کانٹینٹ سے کسی پر منفی اثر پڑا ہو تو وہ اس کے لیے پوری قوم سے معافی مانگتے ہیں۔
یوٹیوبر نے کہاکہ ان کی ہمیشہ کوشش رہی ہے کہ وہ لوگوں کو انٹرٹین کریں اور کچھ نیا پیش کرتے رہیں۔ اگر کسی طرح سے ان کے مواد یا پروموشنز سے منفی اثر پڑا ہو تو وہ اس کے لیے بھی معافی چاہتے ہیں۔
ڈکی بھائی نے عدالتی کارروائی پر مکمل اعتماد کا اظہار کرتے ہوئے کہا کہ وہ قانونی عمل کے مطابق عدالت کے تعاون کے لیے تیار ہیں اور جج کا جو بھی فیصلہ ہوگا وہ اسے قبول کریں گے۔
ویڈیو میں انہوں نے اپنی اور اپنی فیملی کی ساڑھے تین ماہ کی صورتحال بیان کی، اور بتایا کہ 16 اگست 2025 کو وہ اپنے گھر میں دعوت کی خوشی منا رہے تھے اور غیر ملکی ایونٹ کے لیے تیار ہو رہے تھے، لیکن اس دوران ان کی مشکلات کا آغاز ہوا۔
واضح رہے کہ ڈکی بھائی کو 17 اگست 2025 کو لاہور ایئرپورٹ پر جوا ایپس کے ذریعے منی لانڈرنگ کے الزام میں گرفتار کیا گیا تھا۔
مزید پڑھیں: ڈکی بھائی کی تحقیقات کرنے والے 7 گرفتار افسران مستعفی
بعد ازاں لاہور ہائیکورٹ نے 10 لاکھ روپے کے مچلکوں کے عوض ان کی درخواست ضمانت منظور کی اور وہ 26 نومبر کو رہا ہوئے۔
