وزیراعظم پاکستان شہباز شریف نے ملک میں آئی ٹی انفراسٹرکچر بہتر کرنے اور نوجوانوں کے لیے ملازمت کے مواقع پیدا کرنے کے لیے مزید اقدامات کی ہدایت کی ہے۔
وزیراعظم پاکستان شہباز شریف کی زیرصدارت معاشی ترقی کے لیے آئی ٹی شعبے کے حوالے سے بنائے گئے نجی شعبے کے ورکنگ گروپ کا اجلاس ہوا۔
مزید پڑھیں: ٹیکنالوجی اصلاحات: پاکستان کی آئی ٹی سیکٹر میں غیرمعمولی رفتار سے ترقی
اجلاس میں وزیراعظم کو معاشی ترقی کے لیے آئی ٹی شعبے میں اصلاحات کے حوالے سے سفارشات پیش کی گئیں، وزیراعظم نے آصف پیر کی سربراہی میں بنائی گئی کمیٹی کی سفارشات کا خیر مقدم کیا۔
انہوں نے کہاکہ معاشی مسائل کے باوجود ملکی آئی ٹی شعبے نے ترقی کی، آئی ٹی برآمدات میں بتدریج اضافہ انتہائی خوش آئند ہے۔
وزیراعظم نے کہاکہ آئی ٹی شعبے میں افرادی قوت کی تکنیکی تربیت، ٹیکس میں آسانیوں اور دیگر امور میں بہتری کے لیے حکومت سرگرم عمل ہے۔
انہوں نے کہاکہ آئی ٹی کی تکنیکی تربیت کے لیے تمام اقدامات پاکستانی نوجوانوں کو عالمی آئی ٹی مارکیٹ میں بطور تجربہ کار افرادی قوت متعارف کرانے پر مرکوز ہیں۔
وزیراعظم نے ہدایت کی کہ نوجوانوں کے لیے ملازمت کے مواقع پیدا کرنے کے لیے مزید اقدامات کیے جائیں، انہوں نے ملک میں آئی ٹی انفراسٹرکچر بہتر کرنے کی ہدایت بھی کی۔
شہباز شریف نے کہاکہ ڈیجیٹل معیشت کی ترویج صارفین کی انٹرنیٹ تک رسائی پر منحصر ہے۔
وزیراعظم نے وزیر خزانہ کی سربراہی میں بنائی گئی اعلیٰ سطح کی کمیٹی کو اجلاس میں پیش کی گئی سفارشات کا جائزہ لے کر 2 ہفتوں میں رپورٹ پیش کرنے کی ہدایت کی۔
اجلاس میں وزیراعظم کو ڈیجیٹل معیشت کو وسعت دینے، آئی ٹی برآمدات میں اضافے اور آئی ٹی شعبے میں دیگر اصلاحات کے حوالے سے سفارشات پیش کی گئیں۔ جبکہ اجلاس میں ڈیٹا پر مبنی گورننس ماڈل کی تشکیل پر بریفنگ دی گئی۔
مزید پڑھیں: پاکستان کو ڈیجیٹل نیشن بنانے کی جانب قدم، ایک اور سنگ میل عبور کرلیا گیا
اجلاس میں برآمدات کے لیے مارکیٹ شیئر بڑھانے، پاکستان سافٹ ویئر ایکسپورٹ بورڈ کی مکمل ڈیجیٹائزیشن، ای روزگار اسکیم اور اسٹارٹ اپ اینوویشن ایکوسسٹم جیسے اقدامات پر نجی شعبے کی جانب سے حکومتی اقدامات کی تعریف کی گئی۔
اجلاس میں وفاقی وزرا احسن اقبال، جام کمال، محمد اورنگزیب، ڈاکٹر مصدق مسعود ملک، احد چیمہ، عطااللہ تارڑ، شزا فاطمہ خواجہ اور دیگر اعلیٰ حکام نے شرکت کی۔
