وزیر اعلیٰ خیبر پختونخوا سہیل آفریدی نے صوبائی کابینہ اجلاس سے خطاب میں وفاقی اور پنجاب حکومت کو شدید تنقید کا نشانہ بناتے ہوئے کہا ہے کہ عمران خان، ان کی اہلیہ بشریٰ بی بی اور بہنوں کے ساتھ مسلسل ظلم روا رکھا جا رہا ہے، جو ملک میں خطرناک اور غیر جمہوری روایت کو جنم دے رہا ہے۔
یہ بھی پڑھیں:سہیل آفریدی نے اپنے حلقے میں سیکیورٹی آپریشن کی اجازت دے دی، شیر افضل مروت کا دعویٰ
انہوں نے کہا کہ گزشتہ دنوں پرامن کارکنوں اور رہنماؤں پر واٹر کینن کے ذریعے زہریلا کیمیکل استعمال کیا گیا جس سے متعدد افراد بشمول عمران خان کی بہنیں متاثر ہوئیں۔ وزیر اعلیٰ نے اسے غیر انسانی اور غیر آئینی رویہ قرار دیتے ہوئے اس کی بھرپور مذمت کی۔
وفاقی حکومت نے این ایف سی فنڈز روکے، ترقیاتی منصوبے متاثر
وزیر اعلیٰ سہیل آفریدی نے بتایا کہ 2025-26 کی پہلی سہ ماہی کے این ایف سی فنڈز تاحال صوبے کو جاری نہیں کیے گئے۔ ان فنڈز کی عدم فراہمی سے قبائلی اضلاع میں ترقیاتی سرگرمیاں متاثر ہو رہی ہیں۔
انہوں نے کہا کہ صوبائی حکومت اپنے وسائل سے ترقیاتی کام جاری رکھ رہی ہے تاکہ قبائلی علاقوں میں عوامی مشکلات میں اضافہ نہ ہو۔
عمران خان اور اہل خانہ پر کارروائیاں قابلِ مذمت ہیں
وزیر اعلیٰ نے کہا کہ وفاق اور پنجاب حکومت کی پوری توجہ عمران خان اور تحریک انصاف کو نشانہ بنانے پر ہے۔ یہ سیاسی انتقام ملک کی جمہوریت کو غلط سمت میں دھکیل رہا ہے۔
انہوں نے کہا کہ منگل کو کارکنوں پر کیمیائی واٹر کینن کا استعمال سنگین انسانی حقوق کی خلاف ورزی ہے۔
معیشت زبوں حالی کا شکار، حکومتی ترجیحات غلط ہیں
سہیل آفریدی نے حکومتِ وقت کی معاشی پالیسیوں پر کڑی تنقید کرتے ہوئے کہا کہ پاکستان کی معیشت تباہ حالی کا شکار ہے۔ جی ڈی پی، زراعت اور صنعتی سیکٹر سمیت تمام معاشی اشاریے نیچے جا رہے ہیں، لیکن حکمران صرف عمران خان کی کردار کشی میں مصروف ہیں۔ عوامی فلاح کے لیے کوئی کام نہیں ہو رہا۔
وزرا کو اضلاع کے دورے کرنے کی ہدایت
وزیر اعلیٰ نے کابینہ ارکان کو ہدایت جاری کی کہ ہر وزیر 15 روز میں کم از کم اپنے متعلقہ ضلع کا دورہ کرے تاکہ انتظامی کارکردگی کا جائزہ لیا جا سکے اور عوامی اعتماد بحال ہو۔
یہ بھی پڑھیں:عمران خان کی جیل سے وائرل تصویر، علیمہ خان نے تصدیق کردی
انہوں نے بتایا کہ اگلے کابینہ اجلاس میں چیف سیکریٹری گڈ گورننس روڈ میپ پر تفصیلی بریفنگ دیں گے تاکہ حکومت کی پیش رفت کا جائزہ لیا جا سکے۔
