گھوٹکی میں سیاہ کاری کے نام پر غیرقانونی جرگہ منعقد کرنے کے معاملے پر ڈی آئی جی سکھر رینج کیپٹن (ر) فیصل عبداللہ چاچڑ نے سخت نوٹس لے لیا ہے۔ ڈی آئی جی کے نوٹس کے بعد ایس ایس پی گھوٹکی انور کھیتران کی ہدایت پر پولیس نے فوری کارروائی کرتے ہوئے ایک ملزم کو گرفتار کر لیا۔
مزید پڑھیں: سیاہ کاری کا الزام، بولان میں خاتون سمیت 2 افراد قتل
پولیس کے مطابق ڈہرکی میں سیاہ کاری کے جھوٹے الزام پر جرگہ منعقد کیا گیا تھا، جس میں متاثرہ خاندان پر 10 لاکھ روپے جرمانہ عائد کرنے اور 2 لڑکیوں کو بطور ازالہ دینے کا غیر قانونی اور انسانیت سوز فیصلہ کیا گیا۔
کارروائی کے دوران ملزم شاہنواز بھیو کو گرفتار کر لیا گیا، جبکہ جرگے میں ملوث 6 ملزمان کے خلاف مقدمہ درج کر لیا گیا ہے۔ پولیس کا کہنا ہے کہ جرگے میں شامل دیگر ملزمان کی گرفتاری کے لیے مختلف مقامات پر چھاپے مارے جا رہے ہیں۔
مزید پڑھیں: متنازع پیکا ایکٹ کے خلاف صحافیوں کے احتجاجی مظاہرے، سرکاری تقریبات کے بائیکاٹ کا اعلان
ایس ایس پی گھوٹکی انور کھیتران نے واضح کیا ہے کہ ضلع بھر میں غیر قانونی جرگوں کے خلاف زیرو ٹالرینس پالیسی اپنائی گئی ہے اور سیاہ کاری یا کسی بھی قسم کے غیر قانونی فیصلوں میں ملوث افراد کے خلاف سخت قانونی کارروائی عمل میں لائی جائے گی۔
