وزیراعظم شہباز شریف نے پی آئی اے کی کامیاب نجکاری کرنے والی ٹیم کی کاؤشوں کو سراہتے ہوئے انہیں خراج تحسین پیش کیا ہے۔
نجکاری کے لیے کوششیں کرنے والے وزرا اور افسران کے اعزاز میں اسلام آباد میں منعقدہ ایک تقریب میں ان کا کہنا تھا کہ پی آئی اے کی نجکاری خیریت سے انجام کو پہنچی، ماضی میں اس حوالے سے کئی کوششیں ہوئیں لیکن کامیابی نہیں ملی، ہم نے ہمت نہیں ہاری اور وزارتوں کے ساتھ مشاورت اور تیاری کے بعد نجکاری کی تاریخ طے کی۔
یہ بھی پڑھیے: پی آئی اے کی نجکاری مکمل، 135 ارب میں سے حکومت کو کتنی رقم ملے گی؟
وزیراعظم نے کہا کہ بولی کا انعقاد شفاف طریقے سے ہوا جسے براہ راست نشر کیا گیا، کابینہ کی میٹنگ میں سو ارب روپے ریفرنس پرائز رکھنے کا فیصلہ ہوا، آئین و قانون کے مطابق بولیاں وصول کیں اور 135 ارب روپے کی بولی حاصل ہوئی جو ریفرنس قیمت سے 35 ارب روپے زیادہ تھی۔
وزیراعظم کا کہنا تھا کہ بولی کے بعد حکومت کے پاس موجود باقی ماندہ شیئرز کی قیمت میں بھی اضافہ ہوا اور 100 فیصد شیئرز کی قیمت 180 ارب روپے تک پہنچ گئی ہے، ہم نے پاکستان کے وسیع تر مفاد میں جو فیصلے کیے جاسکتے ہیں کیے، پی آئی اے کی خریداری کرنے والے سرمایہ کاروں کے اعتماد میں اضافہ کیا۔
یہ بھی پڑھیے: پی آئی اے کی نجکاری: ملک کے لیے بڑا قدم، 75 فیصد شیئرز 135 ارب روپے میں فروخت
انہوں نے پی آئی اے خریدنے والے سرمایہ کاروں اور پاکستانی قوم کو مبارکباد دی اور حکومتی ٹیم کو ان کی کاؤشوں پر خراج تحسین پیش کیا۔ ان کا کہنا تھا کہ فیلڈ مارشل عاصم منیر، نائب وزیراعظم اسحاق ڈار، وزیردفاع خواجہ آصف، وزیر خزانہ محمد اورنگزیب اور چیئرمین نجکاری کمیشن محمد علی سمیت تمام متعلقہ حکام نے نجکاری کے حوالے سے انتھک کوششیں کیں۔
وزیراعظم نے کہا کہ ایک ایسے ادارے کی نجکاری ہوئی جس میں سالانہ عوام کے 35 ارب روپے خرچ ہوتے تھے، جو ملک کو خوشحال بنانے کے لیے کام کررہے ہیں وہ ہمارے سروں کے تاج ہیں۔
