خیبرپختونخوا کے ضلع ڈیرہ اسماعیل خان میں سیکیورٹی فورسز نے انٹیلی جنس بنیاد پر کارروائی کرتے ہوئے خوارج گروہ کے 2 دہشتگردوں کو ہلاک کر دیا، جن میں انتہائی مطلوب سرغنہ دلاور بھی شامل ہے۔
یہ بھی پڑھیں:فتنہ الخوارج امریکی ہتھیار پاکستان کے خلاف استعمال کر رہی ہے، امریکی جریدے کا انکشاف
آئی ایس پی آر کے مطابق 24 دسمبر 2025 کو سیکیورٹی فورسز نے ڈیرہ اسماعیل خان کے علاقے کلاچی میں خوارج کی موجودگی کی اطلاع پر انٹیلی جنس بیسڈ آپریشن کیا۔ کارروائی کے دوران فورسز نے خوارج کے ٹھکانے کو مؤثر انداز میں نشانہ بنایا، جس کے نتیجے میں 2 خوارج ہلاک ہو گئے۔
ہلاک ہونے والوں میں خوارج گروہ کا سرغنہ دلاؤر بھی شامل ہے، جو قانون نافذ کرنے والے اداروں کو متعدد دہشتگرد سرگرمیوں میں مطلوب تھا۔ حکومت کی جانب سے دلاور کے سر کی قیمت 40 لاکھ روپے مقرر کی گئی تھی۔
کارروائی کے دوران ہلاک دہشتگردوں کے قبضے سے اسلحہ اور گولہ بارود بھی برآمد کیا گیا۔ آئی ایس پی آر کے مطابق یہ دہشتگرد سیکیورٹی فورسز پر حملوں اور معصوم شہریوں کے قتل سمیت کئی دہشت گرد کارروائیوں میں ملوث رہے۔
بیان میں کہا گیا ہے کہ علاقے میں مزید کسی بھی بھارتی سرپرستی میں سرگرم خوارج کے خاتمے کے لیے کلیئرنس اور سرچ آپریشن جاری ہیں۔ سیکیورٹی فورسز اور قانون نافذ کرنے والے ادارے قومی ایکشن پلان کے تحت منظور شدہ وژن ’عزمِ استحکام‘ کے تحت ملک سے غیر ملکی سرپرستی میں ہونے والی دہشت گردی کے مکمل خاتمے کے لیے اپنی کارروائیاں پوری رفتار سے جاری رکھیں گے۔
