بنگلہ دیش نیوی نے خلیجِ بنگال میں معمول کی گشت کے دوران ڈیزل اور سیمنٹ میانمار اسمگل کرنے کی کوشش ناکام بناتے ہوئے 11 افراد کو حراست میں لے لیا اور ایک کشتی ضبط کر لی۔
نیوی حکام کے مطابق کارروائی جمعہ کو کُتبُدیہ کے آؤٹر اینکریج کے قریب عمل میں آئی۔ اسمگلنگ نیٹ ورک سے متعلق خفیہ اطلاعات پر سینٹ مارٹن جزیرے اور ملحقہ سمندری حدود میں گشت بڑھا دی گئی تھی۔
یہ بھی پڑھیے: بنگلہ دیشی فورسز کی بھارتی سرحد کے قریب کارروائی، انڈین ساختہ دھماکا خیز مواد برآمد
گشت کے دوران نیوی جہاز شہید محب اللہ نے کتبُدیہ لائٹ ہاؤس سے تقریباً 42 میل دور ایک مشتبہ ماہی گیر کشتی کو دیکھا۔ رکنے کا اشارہ دینے پر کشتی نے فرار کی کوشش کی تاہم اسے روک لیا گیا۔ کشتی کی شناخت ایف بی انکیتا انویشہ کے نام سے ہوئی۔
تلاشی کے دوران کشتی سے 1,000 لیٹر ڈیزل اور بنگلہ دیش میں تیار کردہ سیمنٹ کی 650 بوریاں برآمد ہوئیں، جو مبینہ طور پر منافع کے لیے غیرقانونی طور پر میانمار لے جائی جا رہی تھیں۔
یہ بھی پڑھیے: بنگلہ دیش: میگھنا دریا پر 2 لانچوں کے تصادم سے 8 افراد ہلاک
کشتی میں سوار تمام 11 افراد کو حراست میں لے کر قانونی کارروائی کے لیے پٹینگا ماڈل پولیس اسٹیشن کے حوالے کر دیا گیا ہے۔
نیوی حکام کا کہنا ہے کہ بنگلہ دیش کی سمندری حدود کے تحفظ اور اسمگلنگ، انسانی اسمگلنگ سمیت دیگر غیرقانونی سرگرمیوں کی روک تھام کے لیے باقاعدہ بحری گشت جاری رہے گی۔
