چترال کے علاقے گہریت گول میں ایک روسی شہری نے قانونی اجازت کے تحت کشمیری مارخور کا شکار کر لیا۔ شکار کمیونٹی بیسڈ ٹرافی ہنٹنگ پروگرام کے تحت کیا گیا، جس سے حاصل ہونے والی آمدن مقامی آبادی کی فلاح و بہبود پر خرچ کی جائے گی۔
یہ بھی پڑھیں:مارخور اور آئی بیکس کے شکار کے مہنگے ترین پرمٹ، بولی کیسے ہوتی ہے؟
محکمہ جنگلی حیات کے مطابق روسی شکاری نے مارخور کے شکار کا لائسنس 68 ہزار امریکی ڈالر میں حاصل کیا تھا۔ شکار کیے گئے مارخور کے سینگوں کی لمبائی 41 انچ بتائی گئی ہے۔
محکمہ جنگلی حیات کا کہنا ہے کہ یہ شکار باقاعدہ ضابطوں کے تحت کرایا گیا اور اس پروگرام سے حاصل ہونے والی آمدن کا بڑا حصہ مقامی کمیونٹی کی معاشی بہتری، ترقیاتی منصوبوں اور فلاحی سرگرمیوں کے لیے مختص کیا جائے گا۔
محکمہ جنگلی حیات کے مطابق کمیونٹی بیسڈ ٹرافی ہنٹنگ پروگرام کا بنیادی مقصد نایاب جنگلی حیات کا تحفظ یقینی بنانا اور مقامی آبادی کو براہ راست معاشی فوائد فراہم کرنا ہے تاکہ وہ قدرتی وسائل کے تحفظ میں فعال کردار ادا کر سکیں۔
