سنگاپور میں ایک غیر معمولی اور سنسنی خیز واقعے میں ایم آر ٹی ٹریکس پر چڑھ کر گزرتی ٹرین کی ویڈیو بنانے اور بعد ازاں پولیس سے بچنے کے لیے ایک بزرگ خاتون کے بستر کے نیچے چھپنے والے 17 سالہ لڑکے کو عدالت نے 18 ماہ کی پروبیشن کی سزا سنا دی۔
یہ بھی پڑھیں: بھارتی ویلاگر کی چلتی ٹرین کی چھت سے مناظر فلماتے ویڈیو وائرل
عدالتی ریکارڈ کے مطابق یہ لڑکا 2025 میں 2 مختلف واقعات میں ملوث رہا۔ پہلے واقعے میں اس نے سروس کے دوران سیمی اور تنہ میرا ایم آر ٹی اسٹیشنز کے درمیان ریلوے ٹریکس تک خفیہ راستے سے رسائی حاصل کی، چہرہ ڈھانپ کر ٹریک کے بالکل قریب لیٹ گیا اور تیز رفتار ٹرین کے گزرنے کی ویڈیو بنائی۔
یہ ویڈیو بعد میں سوشل میڈیا پر وائرل ہوئی، جس پر ٹرانسپورٹ حکام نے پولیس کو رپورٹ دی۔
دوسرے واقعے میں لڑکے نے آدھی رات کے وقت ایک رہائشی عمارت کی چھت پر چڑھنے کی مہم جوئی کی۔ پولیس کے پہنچنے پر وہ عمارت سے نیچے اترتے ہوئے ایک فلیٹ میں داخل ہو گیا اور 86 سالہ خاتون کے بستر کے نیچے جا چھپا، جو اس وقت گہری نیند میں تھیں اور اس ڈرامائی منظر سے لاعلم رہیں۔ تقریباً آدھے گھنٹے بعد لڑکے نے خود دروازہ کھول کر پولیس کے سامنے ہتھیار ڈال دیے۔
یہ بھی پڑھیں: برفیلے پہاڑ پر وینا ملک کی مبینہ ’اوور ایکٹنگ‘ نے کیا گل کھلائے؟
لڑکے نے نومبر 2025 میں عوامی تحفظ کو خطرے میں ڈالنے اور غیر قانونی داخلے کے الزامات میں جرم قبول کیا۔ سماعت کے دوران عدالت کو بتایا گیا کہ اس کے اقدامات بدنیتی کے بجائے خطرناک مہم جوئی اور غلط فیصلوں کا نتیجہ تھے۔
A 17-year-old boy has been charged with criminal trespass and endangering the safety of MRT passengers in Singapore after allegedly climbing onto an operational train track between Simei and Tanah Merah stations — an incident that sparked concern after a video of the act surfaced… pic.twitter.com/RDWKg99MAx
— Malay Mail (@malaymail) July 4, 2025
عدالت نے 6 جنوری کو فیصلہ سناتے ہوئے کہا کہ ایسے واقعات عام طور پر سخت سزا کے متقاضی ہوتے ہیں، تاہم کم عمری اور اصلاح کے امکانات کو دیکھتے ہوئے لڑکے کو جیل کے بجائے 18 ماہ کی پروبیشن دی گئی۔
فیصلے کے تحت اسے 80 گھنٹے کمیونٹی سروس، رات کے اوقات میں کرفیو، نفسیاتی نگرانی اور علاج کی پابندی کرنا ہوگی، جبکہ اس کے والدین کو 5,000 سنگاپور ڈالر کا ضمانتی بانڈ جمع کرانا ہوگا۔
