معروف پاکستانی ٹیلی وژن میزبان، اداکارہ اور پروڈیوسر ندا یاسر ایک بار پھر سوشل میڈیا پر زیرِ بحث ہیں۔ حالیہ دنوں میں ان کے ایک مارننگ شو کا ویڈیو کلپ وائرل ہو رہا ہے جس میں انہوں نے ذاتی تجربہ بیان کرتے ہوئے انکشاف کیا کہ ایک موقع پر ان کے سر میں جوئیں پڑ گئی تھیں۔
ندا یاسر کے مطابق انہوں نے دبئی سے ہیئر ایکسٹینشنز لگوائی تھیں جو باقاعدہ سلائی کے ذریعے ان کے بالوں میں جوڑی گئی تھیں اور بظاہر نہایت خوبصورت دکھائی دیتی تھیں۔ انہوں نے بتایا کہ ایکسٹینشنز دھونے کے بعد اصل بال تو جلد خشک ہو جاتے تھے تاہم جہاں ایکسٹینشنز لگائی گئی تھیں وہ حصہ نم رہتا تھا جس کے باعث جوئیں پیدا ہو گئیں۔
نِدا یاسر نے مزید کہا کہ مسئلے کی نوعیت کا علم ہوتے ہی انہوں نے فوری طور پر پارلر جا کر ہیئر ایکسٹینشنز نکلوا دیں۔ ان کا کہنا تھا کہ یہ تجربہ ان کے لیے ایک سبق تھا۔
سوشل میڈیا پر وائرل ہونے والی اس ویڈیو پر صارفین کی جانب سے ملا جلا ردِعمل سامنے آ رہا ہے۔ بعض صارفین نے نِدا یاسر کی ایمانداری اور بے باکی کو سراہتے ہوئے کہا کہ انہوں نے ایک ایسے ذاتی مسئلے کا برملا اعتراف کیا ہے جس کا اظہار عموماً لوگ عوامی سطح پر کرنے سے گریز کرتے ہیں۔
یہ بھی پڑھیں: ندا یاسر ایک بار پھر ٹرولنگ کا شکار، نیو ایئر لُک پر صارفین برہم
دوسری جانب کچھ صارفین کا کہنا ہے کہ یہ واقعہ بھی نِدا یاسر کی جانب سے حد سے زیادہ ذاتی تجربات شیئر کرنے کی ایک اور مثال ہے۔ ناقدین کے مطابق مارننگ شو جیسے پلیٹ فارم پر اس نوعیت کی گفتگو مناسب نہیں سمجھی جاتی۔ اس حوالے سے سوشل میڈیا پر مختلف آرا کا اظہار کیا جا رہا ہے اور بحث کا سلسلہ جاری ہے۔
واضح رہے کہ نِدا یاسر گزشتہ تقریباً 17 برس سے نجی ٹی وی چینل اے آر وائی ڈیجیٹل پر مارننگ شو گڈ مارننگ پاکستان کی میزبانی کر رہی ہیں۔ وہ اپنی بے باک گفتگو اور ذاتی تجربات شیئر کرنے کے باعث اکثر خبروں کی زینت بنتی رہتی ہیں۔ حالیہ وائرل ویڈیو پر بھی صارفین کی جانب سے مختلف ردِعمل سامنے آ رہے ہیں۔
