برطانوی خبر رساں ادارے رائٹرز کے مطابق ایران کے خلاف امریکی فوجی کارروائی کسی بھی وقت شروع ہو سکتی ہے، جب کہ خطے میں بڑھتی ہوئی کشیدگی، فوجی نقل و حرکت اور صدر ڈونلڈ ٹرمپ کے سخت بیانات نے حملے کے خدشات کو مزید تقویت دے دی ہے۔
یہ بھی پڑھیں:ٹرمپ کے حکم پر ایران پر امریکی حملہ؟ ممکنہ فوجی آپشنز سامنے آ گئے
رائٹرز نے باخبر مگر نام ظاہر نہ کرنے والے مغربی اور یورپی حکام کے حوالے سے رپورٹ کیا ہے کہ ایران پر امریکی حملہ قریب دکھائی دے رہا ہے اور یہ کارروائی آئندہ 24 گھنٹوں یا حتیٰ کہ چند گھنٹوں میں بھی ہو سکتی ہے۔ ایک مغربی فوجی عہدیدار کے مطابق تمام اشارے اس بات کی جانب ہیں کہ امریکی حملہ ناگزیر ہے، تاہم یہ بھی کہا گیا کہ موجودہ امریکی انتظامیہ غیر یقینی فضا قائم رکھنا اپنی حکمتِ عملی کا حصہ سمجھتی ہے۔
رپورٹ کے مطابق امریکی صدر ڈونلڈ ٹرمپ نے حالیہ دنوں میں ایران کے خلاف متعدد سخت بیانات دیے ہیں۔ ایران اس وقت شدید عوامی احتجاج کی لپیٹ میں ہے، جو دسمبر کے اواخر میں مہنگائی اور ایرانی ریال کی قدر میں شدید کمی کے باعث شروع ہوا۔ تہران کا مؤقف ہے کہ ان مظاہروں کے دوران ہونے والی ہلاکتوں اور بےامنی کے پیچھے امریکا اور اسرائیل کا ہاتھ ہے۔
JUST IN🇬🇧🇺🇸❌🇶🇦 Britain joins the United States in withdrawing troops from Al-Udeid air Base in Qatar after Al-Thani told U.S. that Qatar will not become a scapegoat of Israel-Iran war.
🚨Finally, Iran is winning from US and West is leaving Middle East 🤩 pic.twitter.com/Ufvt2Z0X34
— RKM (@rkmtimes) January 14, 2026
رائٹرز کے مطابق 2 یورپی حکام کا کہنا ہے کہ امریکی فوجی مداخلت اگلے 24 گھنٹوں میں ہو سکتی ہے، جب کہ ایک اسرائیلی عہدیدار نے بھی عندیہ دیا ہے کہ صدر ٹرمپ ایران پر حملے کا فیصلہ کر چکے ہیں، اگرچہ ممکنہ کارروائی کی نوعیت اور دائرہ کار تاحال واضح نہیں۔
ادھر امریکا نے ممکنہ ایرانی جوابی کارروائی کے پیشِ نظر مشرقِ وسطیٰ میں واقع اپنے فوجی اڈوں سے کچھ عملے کو نکالنا شروع کر دیا ہے۔ امریکی حکام نے خطے میں موجود اپنے شہریوں کو بھی احتیاط برتنے کی ہدایت کی ہے۔
منگل کے روز صدر ٹرمپ نے ایرانی مظاہرین سے ریاستی اداروں کا کنٹرول سنبھالنے کی اپیل کی تھی، جب کہ اس سے قبل وہ یہ کہہ چکے ہیں کہ مدد راستے میں ہے۔ اس سے پہلے امریکی محکمہ خارجہ نے ایران میں موجود تمام امریکی شہریوں کو فوری طور پر ملک چھوڑنے کا مشورہ دیا تھا۔
یہ بھی پڑھیں:ایران امریکا کے اطاعت کے مطالبے کے مقابلے میں ڈٹ کر کھڑا رہے گا، آیت اللہ خامنائی
دوسری جانب ایرانی وزیر خارجہ عباس عراقچی نے کہا ہے کہ ایران امریکا کے ساتھ فوجی تصادم نہیں چاہتا، تاہم وہ جنگ کے لیے تیار ہے۔ انہوں نے یہ بھی واضح کیا کہ اگر بات چیت منصفانہ، باعزت اور برابری کی بنیاد پر ہو تو تہران مذاکرات کے لیے بھی تیار ہے۔
