پاکستان کے 2 مختلف علاقوں گوادر اور سرگودھا میں پیش آنے والے المناک ٹریفک حادثات میں مجموعی طور پر 23 افراد جان سے ہاتھ دھو بیٹھے، جبکہ درجنوں افراد زخمی ہو گئے۔ ایک حادثہ بلوچستان کے ساحلی ضلع گوادر میں مسافر کوچ کو پیش آیا، جبکہ دوسرا سانحہ پنجاب کے ضلع سرگودھا میں شدید دھند کے باعث رونما ہوا۔
یہ بھی پڑھیں:اسلام آباد ٹریفک پولیس کی بڑی کارروائی، جعلی ڈرائیونگ لائسنس بنانے والا گرفتار
گوادر میں کراچی سے جیونی جانے والی ایک مسافر کوچ ہڈ گوٹھ کے مقام پر تیز رفتاری کے باعث بے قابو ہو کر الٹ گئی۔ پولیس کے مطابق حادثے کے نتیجے میں کوچ میں سوار 9 مسافر موقع پر ہی جاں بحق ہو گئے، جبکہ 15 افراد زخمی ہوئے۔
اطلاع ملتے ہی ریسکیو ٹیمیں موقع پر پہنچ گئیں اور زخمیوں کو قریبی اسپتال منتقل کیا گیا۔ پولیس کا کہنا ہے کہ حادثے کی وجوہات جاننے کے لیے تحقیقات شروع کر دی گئی ہیں۔
دوسری جانب پنجاب کے ضلع سرگودھا کے نواحی علاقے میں شدید دھند کے باعث ایک منی ٹرک حادثے کا شکار ہو گیا۔ ریسکیو ذرائع کے مطابق منی ٹرک بے قابو ہو کر گلا پور بنگلہ نہر میں جا گرا، تاہم نہر خشک تھی۔ اس حادثے میں 14 افراد جاں بحق اور 9 زخمی ہوئے۔
سرگودھا کوٹ مومن: گلاپور بنگلہ کے قریب المناک ٹریفک حادثہ،
ٹرک دھند کے باعث نہر میں جا گرا، 14 افراد جاں بحق، متعدد زخمی
حادثہ تھانہ مڈھ رانجھا کی حدود میں رات 1:45 بجے پیش آیا۔
پولیس ذرائع کے مطابق متاثرہ خاندان کا تعلق راولپنڈی سے تھا جو فیصل آباد اپنے ایک رشتہ دار کی فوتگی پر… pic.twitter.com/RSdJm33vtj— Shahid Hussain (@ShahidHussainJM) January 17, 2026
ریسکیو حکام کے مطابق جاں بحق ہونے والوں میں 6 بچے، 5 خواتین اور 3 مرد شامل ہیں۔ منی ٹرک میں مجموعی طور پر 23 افراد سوار تھے جو ایک جنازے میں شرکت کے لیے جا رہے تھے۔
یہ بھی پڑھیں:چاغی: ریکوڈک پروجیکٹ سائٹ روڈ پر خوفناک ٹریفک حادثہ، 11 افراد جاں بحق، 6 زخمی
حادثے کے بعد لاشوں اور زخمیوں کو فوری طور پر ٹی ایچ کیو اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔
پولیس اور ریسکیو اداروں کے مطابق دونوں واقعات کی الگ الگ تحقیقات جاری ہیں، جبکہ حکام نے شہریوں سے خراب موسم اور طویل سفر کے دوران احتیاط برتنے کی اپیل کی ہے۔
