پاکستان میں حالیہ کچھ دنوں میں سولر پینلز کی قیمتوں میں قریباً 8 سے 11 روپے فی واٹ اضافہ ہوا ہے، جبکہ عام طور پر موجودہ موسم کو سولر انڈسٹری کا پیک ٹائم نہیں سمجھا جاتا۔
موسمِ سرما میں صارفین کی جانب سے کم دلچسپی کے باعث سولر پینلز کی طلب محدود رہتی ہے، جس کے نتیجے میں سولر مارکیٹ عموماً سست اور نسبتاً ٹھنڈی دکھائی دیتی ہے، تاہم اس کے برعکس حالیہ دنوں میں سولر پینلز کی قیمتوں میں اضافہ دیکھنے میں آ رہا ہے، جس نے صارفین اور سرمایہ کاروں کو حیران کردیا ہے۔
مزید پڑھیں: لاہور میں سولر پینلز کا اربوں کا فراڈ، تاجروں کے پیسے کس نے ہڑپ کیے؟
سولر پینلز کی قیمتوں میں اس حالیہ اضافے کی بنیادی وجوہات کیا ہیں؟ وی نیوز نے یہ جاننے کی کوشش کی ہے۔
’چینی سولر ماڈیول مینوفیکچررز نے قیمتوں میں اضافہ متعدد عالمی اور صنعتی عوامل کی بنیاد پر کیا‘
سولر انڈسٹری کے ماہر شرجیل احمد سلہری کا کہنا ہے کہ چینی سولر ماڈیول مینوفیکچررز نے قیمتوں میں اضافہ متعدد عالمی اور صنعتی عوامل کی بنیاد پر کیا ہے، جس کے اثرات براہِ راست مقامی مارکیٹ پر بھی پڑ رہے ہیں۔
ان کا کہنا ہے کہ چینی حکومت نے سولر ماڈیولز کی برآمد پر دی جانے والی وی اے ٹی، یعنی ویلیو ایڈڈ ٹیکس کی ایکسپورٹ ریبیٹ میں کمی کر دی ہے، جو رواں سال کی دوسری سہ ماہی میں مکمل طور پر ختم کر دی جائے گی۔ اس حکومتی فیصلے کے باعث سولر ماڈیولز کی برآمدی لاگت میں اضافہ ہوا ہے، جس کا اثر امپورٹ کرنے والے ممالک میں قیمتوں کی صورت میں سامنے آ رہا ہے۔
شرجیل احمد سلہری کے مطابق گزشتہ برس سولر انڈسٹری کو طویل عرصے تک مالی نقصانات کا سامنا رہا، جس کے بعد اب تمام بڑے مینوفیکچررز اپنی لاگت پوری کرنے اور منافع میں بہتری لانے کی کوشش کر رہے ہیں۔ اسی وجہ سے کمپنیوں نے اپنی مصنوعات کی قیمتوں میں اضافہ کیا ہے۔
انہوں نے مزید بتایا کہ فوٹو وولٹک انڈسٹری میں استعمال ہونے والا خام مال جس میں پولی سیلیکون، ایلومینیم، سلور اور کیبلز شامل ہیں، عالمی منڈی میں تیزی سے مہنگا ہو رہا ہے۔ خام مال کی قیمتوں میں اضافے نے سولر پینلز کی پیداواری لاگت کو نمایاں طور پر بڑھا دیا ہے۔
ماہرین کے مطابق سولر انڈسٹری میں پرانی اور کم مؤثر پروڈکشن ٹیکنالوجی کو جدید اور زیادہ بجلی پیدا کرنے والی ٹیکنالوجی سے تبدیل کیا جا رہا ہے۔ اس تبدیلی کے عمل کے دوران پرانی ٹاپ کون ماڈیولز کی پیداوار میں کمی آ رہی ہے، جس کے باعث ان کی دستیابی کم اور قیمتیں زیادہ ہو رہی ہیں۔
شرجیل احمد سلہری نے مزید کہاکہ ان تمام عوامل کو مدنظر رکھتے ہوئے آنے والے دنوں میں سولر ماڈیولز کی قیمتوں میں مزید اضافے کا امکان موجود ہے، جس سے صارفین اور سرمایہ کاروں دونوں کو محتاط رہنے کی ضرورت ہے۔
’عالمی سپلائی چین میں تبدیلیوں کا اثر فوری طور پر مقامی مارکیٹ پر پڑتا ہے‘
پاکستان سولر ایسوسی ایشن کے سینیئر وائس چیئرمین حسنات خان کے مطابق سولر ماڈیولز کی قیمتوں میں حالیہ اضافے کی سب سے بڑی وجہ چینی حکومت کی جانب سے وی اے ٹی ایکسپورٹ ریبیٹ میں کمی ہے۔ اپریل سے 13 فیصد کا یہ ریبیٹ ختم ہو جائے گا، جس کے نتیجے میں مینوفیکچررز کی لاگت میں اضافہ ہوگا۔
’اگرچہ یہ تبدیلی رسمی طور پر اپریل میں نافذ ہوگی، تاہم پاکستان میں اس کا اثر پہلے ہی محسوس ہونا شروع ہو گیا ہے، کیونکہ عالمی سپلائی چین میں تبدیلیوں کا اثر فوری طور پر مقامی مارکیٹ پر پڑتا ہے۔‘
ان کے مطابق دوسری بڑی وجہ سال کے آغاز میں چین میں تعطیلات اور نیو ایئر کی مدت ہے۔ جنوری کے آخر میں قریباً 20 سے 25 دن تک کام سست روی کا شکار رہتا ہے، جس سے امپورٹ اور ایکسپورٹ کی سرگرمیاں محدود ہو جاتی ہیں۔ اس سالانہ رجحان کی وجہ سے ہر سال کے شروع میں قیمتوں میں کچھ حد تک اضافہ دیکھنے کو ملتا ہے۔
حسنات خان کے مطابق یہی دو بنیادی عوامل موجودہ وقت میں سولر ماڈیولز کی قیمتوں میں اضافے کی وضاحت کرتے ہیں، اور اسی وجہ سے مارکیٹ میں اب سے ہی اثرات نظر آنا شروع ہو گئے ہیں۔
ان کا مزید کہنا تھا کہ وی اے ٹی میں اس کمی کی وجہ سے 2026 میں سولر ماڈیولز کی قیمت میں فی واٹ قریباً 5 روپے اضافے کا امکان ہے۔
’پاکستان میں سولر پینلز کی قیمتیں پہلے ہی 20 سے 25 فیصد تک بڑھ چکی ہیں‘
سولر انڈسٹری کے ماہر محمد گلباز کا اس حوالے سے کہنا تھا کہ پاکستان میں سولر پینلز کی قیمتیں پہلے ہی 20 سے 25 فیصد تک بڑھ چکی ہیں اور فی واٹ قیمت قریباً 8 روپے سے زیادہ ہو گئی ہے۔
مزید پڑھیں: سولر پینلز کی درآمد پر کسٹم ویلیو میں کمی: کیا قیمتیں بھی نیچے آئیں گی؟
ان کے مطابق اس پالیسی سے چینی مینوفیکچررز کی لاگت میں اضافہ ہو گا جو براہ راست درآمد کنندگان اور صارفین پر منتقل ہو رہا ہے۔
ان کا کہنا تھا کہ 5 کلو واٹ کا سسٹم پہلے قریباً 5 لاکھ 50 ہزار روپے کا تھا جو اب 6 لاکھ روپے یا اس سے بھی زیادہ کا ہو گیا ہے جبکہ 3 کلو واٹ کے سسٹم پر بھی یہی اثر پڑ رہا ہے۔
