حیدرآباد کے قریب مہران ہائی وے پر پیش آنے والے المناک ٹریفک حادثے نے ہر آنکھ نم کر دی، جہاں ایک تیز رفتار ٹرک اور گاڑی کے درمیان شدید تصادم کے نتیجے میں بچوں سمیت 8 افراد موقع پر ہی جاں بحق ہو گئے، جبکہ دو افراد زخمی ہو گئے۔ واقعے کے بعد علاقے میں سوگ کی فضا چھا گئی۔
یہ بھی پڑھیں:سرگودھا: مسافر گاڑی میں نصب سلنڈر پھٹ گیا، حادثے میں 7 افراد جاں بحق
میڈیا رپورٹ کے مطابق حادثہ مہران ہائی وے پر اس وقت پیش آیا جب ایک گاڑی سامنے سے آنے والے ٹرک سے ٹکرا گئی، تصادم اس قدر شدید تھا کہ گاڑی مکمل طور پر تباہ ہو گئی اور اس میں سوار افراد جانبر نہ ہو سکے۔ ایس ایس پی کے مطابق حادثے میں 2 افراد زخمی بھی ہوئے جبکہ جاں بحق افراد میں 2 مرد، ایک خاتون، 3 بچیاں اور 2 بچے شامل ہیں۔
یہ بھی پڑھیں:کراچی میں ڈمپر کی ٹکر سے ایک اور حادثہ، 9 گاڑیاں نذر آتش
اطلاع ملتے ہی ریسکیو ٹیمیں موقع پر پہنچیں اور لاشوں اور زخمیوں کو فوری طور پر قریبی اسپتال منتقل کر دیا گیا۔ پولیس حکام کا کہنا ہے کہ ٹرک ڈرائیور کو حراست میں لے لیا گیا ہے جبکہ حادثے کی ابتدائی وجہ تاحال معلوم نہیں ہو سکی، اس حوالے سے مختلف پہلوؤں سے تحقیقات جاری ہیں تاکہ واقعے کی اصل وجوہات کا تعین کیا جا سکے۔
