انٹرنیشنل کرکٹ کونسل (آئی سی سی) کے چیئرمین اورچیف ایگزیکٹو منگل کو 2 روزہ دورے پر پاکستان پہنچ رہے ہیں۔
پاکستان کرکٹ بورڈ (پی سی بی ) نے عالمی کرکٹ کونسل کے دونوں بڑے عہدیداروں کی پاکستان آمد کی تصدیق کرتے ہوئے بتایا ہے کہ آئی سی سی کے چیئرمین گریگ بارکلے اور چیف ایگزیکٹو جیف ایلارڈائس 2 روزہ دورے پر منگل کی صبح لاہور پہنچیں گے۔
اپنے دورے کے دوران وہ پاکستان کرکٹ بورڈ(پی سی بی) کی مینجمنٹ کمیٹی کے چیئرمین نجم سیٹھی جو عالمی کرکٹ کونسل کے ڈائریکٹر بھی ہیں سے اورپی سی بی کے چیف آپریٹنگ آفیسر بیرسٹر سلمان اور دیگر اعلیٰ عہدیداروں سے ملاقات کریں گے
پی سی بی کا کہنا ہے کہ ایلارڈائس اس سے قبل بھی پاکستان کا بطور آئی سی سی جنرل منیجراور چیف ایگزیکٹومتعدد بار دورہ کر چکے ہیں تاہم عالمی کرکٹ کونسل کے چیئرمین بارکلے کا پاکستان کا یہ پہلا دورہ ہوگا۔
اس سے قبل ’آئی سی سی‘ کے صدر رے مالی نے 2008 میں پاکستان کا دورہ کیا تھا، اس کے بعد آئی سی سی کے کسی اعلیٰ عہدیدار نے پاکستان کا دورہ نہیں کیا تاہم 2008 کے بعد موجودہ آئی سی سی چیئرمین گریک بارکلے کا پاکستان کا یہ پہلا دورہ ہوگا۔
اکتوبر2004 کے بعد یہ پہلا موقع ہوگا جب آئی سی سی کے دونوں اعلیٰ عہدیدارایک ساتھ پاکستان کرکٹ بورڈ کے ہیڈ کوارٹر کا دورہ کریں گے۔
میڈیا کوریج کا موقع
پاکستان کرکٹ بورڈ ( پی سی بی) نے اعلان کیا ہے کہ میڈیا کے ارکان کو 30 مئی منگل کوصبح 11:45 بجے آئی سی سی کے چیئرمین اور چیف ایگزیکٹو کی قذافی اسٹیڈیم میں آمد کی کوریج کرنے کی اجازت ہوگی۔ مزید معلومات کے لیے برائے مہربانی مسٹر رضا کچلو سے رابطہ کیا جا سکتا ہے۔
بی سی بی نے یہ بھی اعلان کیا ہے کہ دورے کے اختتام پر پی سی بی آئی سی سی کے چیئرمین اورآئی سی سی کے چیف ایگزیکٹو کے ویڈیو کلپ بھی فراہم کرے گا، جسے میڈیا ادارتی مقاصد کے لیے استعمال کرنے کے لیے آزاد ہوگا۔
