آئی سی سی ٹی 20 ورلڈکپ کے گروپ ڈی میں جنوبی افریقہ اور افغانستان کے درمیان کھیلا گیا اہم میچ سنسنی خیز مقابلے کے بعد برابر ہو گیا، جس کے باعث نتیجے کا سپر اوور کے ذریعے فیصلہ کرنے کا اعلان کیا گیا۔ تاہم سپر اوور بھی ٹائی ہوگیا۔ نتیجتاً ایک اور سپر اوور کے ذریعے میچ کو نتیجہ خیز بنانے کا فیصلہ کیا گیا۔ جس میں جنوبی افریقہ نے 23 اسکور بنایا۔ جواب میں افغانستان 2 وکٹوں کے نقصان پر 19 رنز بناسکا۔ یوں گیم جنوبی افریقہ نے جیت لی۔
بھارت کے شہر احمد آباد میں کھیلے گئے میچ میں افغانستان کے کپتان راشد خان نے ٹاس جیت کر پہلے جنوبی افریقا کو بیٹنگ کی دعوت دی۔
جنوبی افریقہ کی بیٹنگ
پروٹیز کی اننگز کا آغاز ایڈم مارکرم اور کوئنٹن ڈی کوک نے کیا، تاہم ٹیم کو ابتدائی جھٹکا اس وقت لگا جب 12 کے مجموعی اسکور پر مارکرم فضل حق فاروقی کی گیند پر کیچ آؤٹ ہو گئے۔
ابتدائی وکٹ گرنے کے بعد ڈی کوک اور ریان ریکلٹن نے ذمہ داری کا مظاہرہ کرتے ہوئے اننگز کو سنبھالا۔ دونوں بیٹرز نے افغان بولرز کا ڈٹ کر مقابلہ کیا اور ایک ہی اوور میں اپنی نصف سنچریاں مکمل کیں۔
ریکلٹن 61 جبکہ ڈی کوک 59 رنز بنا کر پویلین لوٹے۔ بعد ازاں ڈیوالڈ بریوس 23 رنز اور ڈیوڈ ملر 20 رنز بنا کر آؤٹ ہوئے۔
افغان بولرز کی کارکردگی
افغانستان کی جانب سے عظمت اللہ عمرزئی نے 3 جبکہ کپتان راشد خان نے 2 کھلاڑیوں کو آؤٹ کیا اور ٹیم کو میچ میں برقرار رکھا۔
گروپ کی صورتحال
واضح رہے کہ افغانستان کو اپنے پہلے میچ میں نیوزی لینڈ کے ہاتھوں شکست کا سامنا کرنا پڑا تھا، جبکہ جنوبی افریقہ نے اپنے ابتدائی میچ میں کینیڈا کو 57 رنز سے ہرایا تھا۔
اب دونوں ٹیموں کے درمیان اس اہم مقابلے کا فیصلہ سپر اوور میں ہوگا، جہاں اعصاب شکن مقابلے کی توقع کی جا رہی ہے۔
