معروف فلم ساز راجکمار ہیرانی نے اپنی مقبول فلموں ’3 ایڈیٹس‘ اور ’منّا بھائی‘ کے ممکنہ سیکوئلز سے متعلق خوشخبری سنائی ہے۔ جس کے بعد شائقین میں ایک بار پھر امید کی لہر دوڑ گئی ہے۔
بھارتی میڈیا سے گفتگو کرتے ہوئے راجکمار ہیرانی نے بتایا کہ وہ اس وقت دونوں فلموں کے نئے حصوں کے لیے مختلف آئیڈیاز اور اسکرپٹس پر کام کر رہے ہیں۔ تاہم انہوں نے واضح کیا کہ تاحال کسی بھی منصوبے کی حتمی اسکرپٹ کو منظوری نہیں دی گئی۔
یہ بھی پڑھیں: منا بھائی اور سرکٹ 17 برس بعد پھر ایک ساتھ
ان کا کہنا تھا کہ ’منّا بھائی‘ کے تیسرے حصے کے لیے ایک جامع خیال پر خاصی پیش رفت ہو چکی ہے لیکن کہانی کے اختتام سے متعلق ابھی مکمل اطمینان حاصل نہیں ہو سکا۔ اسی طرح ’3 ایڈیٹس‘ کے سیکوئل کے حوالے سے بھی ابتدائی سطح پر تخلیقی عمل جاری ہے۔
یاد رہے کہ ’3 ایڈیٹس‘ میں عامر خان، آر مادھون، شرمن جوشی اور کرینہ کپور نے مرکزی کردار ادا کیے تھے جبکہ بومن ایرانی بھی اہم کردار میں جلوہ گر ہوئے۔ ذرائع کے مطابق اگر منصوبہ حتمی شکل اختیار کرتا ہے تو اصل کاسٹ کی واپسی کا امکان ظاہر کیا جا رہا ہے۔
یہ بھی پڑھیں: کیا ’12ویں فیل‘ آئی آئی ٹی ٹاپر سے بہتر ہے؟
دوسری جانب ’منّا بھائی‘ سیریز میں سنجے دت اور ارشد وارثی کی جوڑی نے منّا بھائی اور سرکٹ کے کرداروں کے ذریعے غیر معمولی مقبولیت حاصل کی تھی۔ اس فرنچائز کے تیسرے حصے کا شائقین طویل عرصے سے انتظار کر رہے ہیں۔
تاحال دونوں فلموں کے نئے حصوں کی باضابطہ پروڈکشن یا ریلیز سے متعلق کوئی سرکاری اعلان سامنے نہیں آیا تاہم راجکمار ہیرانی کے حالیہ بیان نے مداحوں کی توقعات کو ایک بار پھر تازہ کر دیا ہے۔
