افغان طالبان سے وابستہ کمانڈر عبد الحمید خراسانی نے ایک نجی ٹی وی انٹرویو میں دعویٰ کیا ہے کہ ان کے پاس خودکش حملہ آوروں کا ایک گروہ موجود ہے جو غیر مسلم دنیا کا مقابلہ کرنے کی صلاحیت رکھتا ہے۔ ان کے بیان کے بعد سیکیورٹی حلقوں میں تشویش کی لہر دوڑ گئی ہے۔
یہ بھی پڑھیں:افغانستان کے کن علاقوں میں کالعدم ٹی ٹی پی کی محفوظ پناہ گاہیں ہیں؟
میڈیا رپورٹس کے مطابق عبد الحمید خراسانی نے افغانستان کے نجی نشریاتی ادارے طلوع نیوز کو دیے گئے انٹرویو میں کہا کہ ان کے پاس ایسے افراد موجود ہیں جو ضرورت پڑنے پر کارروائی کر سکتے ہیں۔ انہوں نے یہ بھی دعویٰ کیا کہ پاکستان کے اندر بھی ایسے عناصر موجود ہیں جو حملے کرنے کی صلاحیت رکھتے ہیں، اور اشارہ کالعدم تنظیموں بلوچستان لبریشن آرمی (بی ایل اے) اور تحریک طالبان پاکستان (ٹی ٹی پی) کی جانب دیا۔
بیان میں دیے گئے دعوؤں اور دھمکی آمیز لہجے پر تاحال متعلقہ حکام کی جانب سے باضابطہ ردعمل سامنے نہیں آیا، تاہم سیکیورٹی ماہرین اس بیان کو خطے کی صورتحال کے تناظر میں اہم قرار دے رہے ہیں۔
