جموں کشمیر جوائنٹ عوامی ایکشن کمیٹی نے اپنے مطالبات کی منظوری کے لیے حکومت کو واضح ڈیڈلائن دیتے ہوئے 9 جون 2026 کو احتجاج کرنے کا اعلان کر دیا ہے۔ کمیٹی کی جانب سے سابقہ وعدوں پر عملدرآمد کا تقاضا دہراتے ہوئے متعدد نئے نکات بھی پیش کیے گئے ہیں۔
کوٹلی سرساوہ میں منعقدہ مشاورتی اجلاس کے بعد رات گئے جاری اعلامیے میں کہا گیا کہ اجلاس کے شرکا نے لاہور کی ایک یونیورسٹی میں طالبہ فریحہ ابراہیم کی خودکشی کے واقعے پر افسوس اور مذمت کا اظہار کیا۔
اعلامیے میں مطالبہ کیا گیا کہ اس واقعے کی شفاف اور غیرجانبدارانہ تحقیقات کر کے تمام حقائق عوام کے سامنے لائے جائیں۔
مزید پڑھیں: آزاد کشمیر: عوامی ایکشن کمیٹی کی پھر احتجاج کی دھمکی، وزیراعظم میدان میں
کمیٹی نے اپنے مؤقف کو دہراتے ہوئے کہا کہ محکمہ تعلیم سمیت دیگر سرکاری اداروں میں تقرریوں کے لیے این ٹی ایس اور پی ایس سی جیسے اداروں کو فعال بنایا جائے، ایڈہاک بنیادوں پر بھرتیوں کا سلسلہ ختم کیا جائے اور ترقیوں کے لیے مختص کوٹے پر مکمل عملدرآمد یقینی بنایا جائے۔
عوامی ایکشن کمیٹی نے حالیہ اسمبلی اجلاس میں پیش کیے گئے احتساب بیورو ایکٹ کو یکسر مسترد کرتے ہوئے موقف اختیار کیا کہ مجوزہ ترامیم بدعنوانی کے انسداد کے بجائے اس میں اضافے کا سبب بن سکتی ہیں۔ اسی طرح صحافی سہراب برکت کی فوری رہائی کا بھی مطالبہ کیا گیا۔
اجلاس میں ای سی ایل میں شامل افراد کے نام منظرِعام پر نہ لانے پر بھی تشویش ظاہر کی گئی اور مطالبہ کیا گیا کہ متعلقہ فہرست فوری طور پر جاری کی جائے تاکہ ابہام کا خاتمہ ہو۔
اشیائے ضروریہ کے حوالے سے گفتگو کرتے ہوئے رہنماؤں نے ناقص آٹے کی فراہمی پر تحفظات کا اظہار کیا اور کہا کہ نہ صرف آٹے کا معیار بہتر بنایا جائے بلکہ اس کی مقدار میں بھی اضافہ کیا جائے تاکہ عوام کو ریلیف مل سکے۔
صحت کارڈ کے معاملے پر بھی کمیٹی نے خدشات کا اظہار کیا اور حکومت کے ساتھ ساتھ سٹیٹ لائف انشورنس کمپنی سے مطالبہ کیا کہ پالیسی سے متعلق تحفظات فوری دور کیے جائیں اور شہریوں کو 24 گھنٹے مؤثر طبی سہولیات کی فراہمی یقینی بنائی جائے۔ کمیٹی نے ہیلتھ ورکرز کے جاری احتجاج کی حمایت کا اعلان بھی کیا۔
یہ بھی پڑھیے احتجاج کو روکنے کا اختیار، عوامی ایکشن کمیٹی ہمارے ساتھ حکومت کا حصہ بن جائے، وزیراعظم آزاد کشمیر کی پیشکش
کمیٹی کے ایک رکن نے بتایا کہ 38 نکات پر عملدرآمد کے لیے 9 جون کو احتجاج کیا جائے گا، جبکہ اس احتجاج کی تفصیلات عید کے بعد جاری کی جائیں گی۔ رہنماؤں نے واضح کیا کہ وہ بامقصد مذاکرات کے لیے تیار ہیں، تاہم اس کے لیے ضروری ہے کہ حکومت سنجیدگی کا مظاہرہ کرتے ہوئے مطالبات پر فوری پیش رفت کرے۔
واضح رہے کہ گزشتہ برس ستمبر میں بھی ایکشن کمیٹی نے احتجاج کیا تھا جو پرتشدد ہونے کے باعث سیکیورٹی اہلکاروں سمیت 12 افراد جاں بحق ہو گئے تھے۔
عوامی ایکشن کمیٹی نے وفاقی حکومت کے ساتھ ایک معاہدہ کیا تھا، جس کے حوالے سے وفاقی وزرا اور آزاد کشمیر حکومت کا دعویٰ ہے کہ اس پر عملدرآمد کر دیا گیا ہے، تاہم ایکشن کمیٹی کا موقف ہے کہ معاہدے کی پاسداری نہیں کی گئی۔
