رومن کیتھولک چرچ کے سربراہ پوپ لیو چہاردہم نے مشرقِ وسطیٰ اور ایران میں جاری کشیدگی پر گہری تشویش کا اظہار کرتے ہوئے کہا ہے کہ خطے میں پائیدار امن دھمکیوں یا ہتھیاروں سے نہیں بلکہ سنجیدہ اور ذمہ دارانہ مکالمے سے ممکن ہے۔
ویٹی کن سٹی سے جاری یہ بیان ایسے وقت سامنے آیا ہے جب ایران میں سپریم لیڈر آیت اللہ علی خامنہ ای کی مبینہ ہلاکت کے بعد صورتحال انتہائی کشیدہ ہے۔
یہ بھی پڑھیں:دفاعی تنصیبات پر کامیاب ایرانی حملوں نے امریکی سیکیورٹی پر نئی بحث چھیڑ دی
ویٹی کن کے مطابق پوپ لیو چہاردہم نے امریکی صدر ڈونلڈ ٹرمپ کے نام اپنے پہلے عوامی پیغام میں کہا کہ وہ مشرقِ وسطیٰ اور ایران میں پیش آنے والے واقعات کو گہری تشویش کے ساتھ دیکھ رہے ہیں۔
ان کا کہنا تھا کہ استحکام اور امن باہمی دھمکیوں یا تباہی پھیلانے والے ہتھیاروں کے استعمال سے حاصل نہیں ہوتے بلکہ معقول، مخلصانہ اور ذمہ دارانہ بات چیت ہی مسائل کا حل ہے۔
ایران اس وقت شدید عدم استحکام کا شکار ہے، جہاں سپریم لیڈر آیت اللہ علی خامنہ ای کی مبینہ ٹارگٹ کارروائی میں ہلاکت کے دعووں کے بعد خطے میں کشیدگی بڑھ گئی ہے۔ ایرانی حکام نے بعض دعوؤں کی تردید کی ہے تاہم اسرائیل اور امریکہ کے حملوں کے بعد جوابی کارروائیوں کا سلسلہ جاری ہے۔
یہ بھی پڑھیں:جوابی ایرانی کارروائی میں 3 امریکی فوجی ہلاک، واشنگٹن نے تصدیق کردی
حالیہ جھڑپوں اور حملوں کے اثرات قطر اور دبئی سمیت خلیجی خطے کے دیگر حصوں تک بھی پہنچے ہیں، جس سے عالمی سطح پر تشویش میں اضافہ ہوا ہے۔ پوپ لیو چہاردہم کا بیان ایسے وقت سامنے آیا ہے جب عالمی برادری کشیدگی کم کرنے اور وسیع تر جنگ کے خطرے کو روکنے کی کوششوں میں مصروف ہے۔
