شوبز انڈسٹری کے سینئر اداکار و ہدایت کار سیفی حسن نے انکشاف کیا ہے کہ ڈرامہ سیریل ’سنگِ ماہ‘ کی شوٹنگ کے دوران گلوکار عاطف اسلم کی آمد سے قبل پروڈکشن ٹیم کو غیر معمولی انتظامات کرنا پڑے۔
سیفی حسن جن کا شمار پاکستان کے سینئر اور باصلاحیت ہدایتکاروں میں ہوتا ہےحال ہی میں تابش ہاشمی کے پروگرام ’ہنسنا منع ہے‘ میں بطور مہمان شریک ہوئے۔ گفتگو کے دوران انہوں نے ڈرامہ سیریل ’سنگِ ماہ‘ کی شوٹنگ سے جڑا ایک دلچسپ واقعہ سنایا۔
یہ بھی پڑھیں: جواد احمد نے راحت فتح علی خان اور عاطف اسلم کو لالچی قرار دیدیا
ان کا کہنا تھا کہ ’سنگِ ماہ‘ کی شوٹنگ خیبر پختونخوا کے علاقے ڈھاڈر میں جاری تھی کہ عاطف اسلم کی آمد سے ایک دن قبل ان کی ٹیم کی جانب سے وینٹی وین کی فراہمی سے متعلق دریافت کیا گیا۔ سیفی حسن کے مطابق اگرچہ یہ منصوبہ کم بجٹ نہیں تھا تاہم مذکورہ مقام پر وینٹی وین کا انتظام کرنا انتہائی مشکل تھا۔
انہوں نے بتایا کہ عاطف اسلم کی آمد سے قبل پروڈکشن ٹیم نے عجلت میں متبادل انتظام کیا اور ایک گائے کے باڑے کو ڈریسنگ روم میں تبدیل کر دیا۔ باڑے کو لے کر اسے صاف کروایا گیا، رنگ و روغن کیا گیا، قالین بچھایا گیا اور محض 24 گھنٹوں میں اسے مکمل طور پر ایک ڈریسنگ روم کی شکل دے دی گئی۔
یہ بھی پڑھیں: عاطف اسلم، راحت فتح علی اور عابدہ پروین شادیوں میں پرفارمنس کے کتنے کروڑ لیتے ہیں؟
سیفی حسن کے مطابق عاطف اسلم کو ابتدائی طور پر اس جگہ کی اصل حقیقت کا علم نہیں تھا۔ بعد ازاں جب انہیں بتایا گیا کہ یہ مقام پہلے گائے کا باڑا تھا تو انہوں نے اس پر حیرت کا اظہار کیا اور اس خوب محظوظ ہوئے۔
سیفی حسن نے عاطف اسلم کو خوش اخلاق شخصیت قرار دیتے ہوئے کہا کہ انہوں نے صورتحال کو خوش دلی سے قبول کیا اور کسی قسم کی ناگواری ظاہر نہیں کی۔
