وزیراعظم محمد شہبازشریف ترکیہ کے صدر رجب طیب اردوان کی دعوت پر 3 جون 2023 کو انقرہ میں صدراتی حلف برداری کی تقریب میں شرکت کریں گے۔ وزیراعظم آج شام ترکی کے دورے پر روانہ ہوں گے اور کل تقریب میں شریک ہوں گے۔
ترجمان وزیراعظم آفس کے مطابق وزیراعظم کا دورہ، پاک ترکیہ کے مابین گہرے برادرانہ تعلقات کا اعادہ ہوگا۔ وزیراعظم محمد شہباز شریف 28 مئی 2023 کو رجب طیب اردوان کے ترکیہ کی صدارت کے لیے دوبارہ انتخاب پرحکومت اور پاکستانی عوام کی جانب سے مبارکباد پیش کریں گے۔
ترجمان کا کہنا تھا پاکستان اور ترکیہ کے درمیان کثیر الجہتی تعلقات کے مزید فروغ کے لیے وزیر اعظم صدر اردوان کو اسلام آباد میں ہونے والی اعلیٰ سطح سٹریٹجک کوآپریشن کونسل میں شرکت کی دعوت دیں گے۔
ترجمان وزیراعظم آفس کا کہنا تھا پاکستان اور ترکیہ کے تعلقات مشترکہ عقائد، ثقافت اور تاریخ کی مماثلت پر مبنی ہیں، اور یہ باہمی اعتماد اور علاقائی اور عالمی معاملات پر نظریات کی ہم آہنگی سے مضبوط ہوتے ہیں۔ اعلیٰ قیادت کی سطح پر متعدد تبادلے دونوں ممالک کے مابین گہرے تعلق کے نمایاں پہلو ہیں۔
حکومتی ذرائع کا کہنا ہے کہ آج طلب کیا گیا قومی سلامتی کمیٹی کا اجلاس وزیراعظم کے دورہ ترکیہ کی وجہ سے ملتوی کیا گیا ہے کیوں کہ وزیراعظم آج شام ترکیہ روانہ ہوں گے۔
